मन्त्रिपरिषदले स्वीकृत गर्‍यो प्रधानमन्त्रीको अमेरिका भ्रमण, ३ अर्ब येन अनुदान लिने निर्णय

काठमाडौँ- सरकारले प्रधानमन्त्री पुष्पकमल दाहाल ‘प्रचण्ड’को संयुक्त राष्ट्रसङ्घको कार्यक्रममा सहभागी हुने प्रयोजनका लागि अमेरिका भ्रमण स्वीकृत गरेको छ। सिंहदरबारस्थित प्रधानमन्त्री तथा मन्त्रिपरिषद्को कार्यालयमा बुधबार बसेको मन्त्रिपरिषद् बैठकले यस्तो निर्णय गरेको हो।

प्रधानमन्त्रीले नेपाली प्रतिनिधिमण्डलको नेतृत्व गर्दै संयुक्त राज्य अमेरिकाको न्यूयोर्कमा आयोजना हुने संयुक्त राष्ट्र सङ्घको ७८औँ महासभामा सहभागी हुनेछन्। भदौ ३० गते राष्ट्रसंघीय महासभामा सहभागी हुन प्रधानमन्त्री अमेरिका जाने तयारीमा छन्। असोज ४ गते महासभालाई सम्बोधन गरेर उनी त्यतैबाट चीनको बेइजिङतर्फ लाग्ने योजनामा छन्।

सञ्चार तथा सूचना प्रविधि रेखा शर्माका अनुसार बैठकले धुलिखेल अस्पताल, ट्रमा तथा आपत्कालीन केन्द्र सुधार परियोजनाका लागि जापान सरकारबाट प्राप्त हुने जापानी ३ अर्ब २९ करोड ६० लाख जापानी येन अनुदान सहायता स्वीकार गर्ने निर्णयसमेत गरेको छ।

यस्तै मन्त्रिपरिषद्ले धितोपत्रसम्बन्धी ऐन, २०६३ को दफा ११६ को उपदफा १ बमोजिम नेपाल धितोपत्र बोर्डलाई धितोपत्र तथा निष्कासन सातौँ संशोधन नियमावली २०८० संशोधन गर्न स्वीकृत प्रदान गर्ने निर्णय गरेको मन्त्री शर्माले जानकारी दिइन्।

सरकारले राजनीतिक परिवर्तनमा गीत सङ्गीतका माध्यमबाट सहयोग पुर्‍याएका स्व जेवी टुहुरेलाई जनगायकको उपाधि प्रदान गर्ने निर्णयसमेत गरेको छ।

बैठकले संस्कृति, पर्यटन तथा नागरिक उड्डयनमन्त्री सुदन किरातीको पिताको निधनमा दुःख व्यक्त गर्दै श्रद्धाञ्जली अर्पण गरेको छ। बैठकले शोक सन्तप्त परिवारजनमा समवेदना व्यक्त गरेको छ।