रवि लामिछानेको प्रश्न- ठूलाहरू पर्ने बित्तिकै किन सुस्तायो सुन तस्करी काण्ड?

काठमाडौँ– राष्ट्रिय स्वतन्त्र पार्टीका सभापति रवि लामिछानेले बिभिन्न प्रकरणमा सत्तापक्षका नेताको नाम जोडिने वित्तिकै छानविन सुस्ताएको भन्दै सरकारले भन्ने गरेको सुशासनप्रति नै प्रश्न गरेका छन्।

बुधबार प्रतिनिधिसभा बैठकमा सभापति लामिछानेले सरकारले सुन तस्करी प्रकरणमा छानविन गरिरहेको प्रहरी प्रमुखलाई सरुवा गर्ने सरकारको निणर्यले सरकारको सुशासनको नाराप्रति नै शंका गर्ने स्पस्ट मौका दिएको बताए।

‘सरकारले सुशासनको कुरा गर्‍यो, हामीले शंकाको सुविधा दियौँ। शंकाको सुविधा दिइरहँदा सरकारले भनिरहेको सुशासन कहाँसम्मको सुशासन हो? आफ्नो ढोकासम्म आरोप नआइपुग्दासम्मको सुशासनको कुरा गरेको हो कि? साँच्चैको सुशासनको कुरा गरेको हो? यो गम्भीर प्रश्न बनेर खडा भएको छ,’ उनले भने।

त्यस्तै सभापति लामिछानेले सरकारले आफ्ना मान्छे मुछिने साथै सुन तस्करीमा छानविनलाई सुस्त बनाएको र ललिता निवासको जग्गा प्रकरणमा पनि ठूलालाई सुन पानी हालेर चोख्याएको भन्दै सरकारले भन्ने गरेको सुशासन प्रति नै प्रश्न गरे।

‘भुटानी शरणार्थी प्रकरणमा जति पनि प्रहरी अधिकारी काम गरिरहेको थिए तिनको सरुवा बढुवा भयो। शुसासनको यो प्रमाण पर्याप्त छैन सरकारलाई शंका गर्नको निमित्त?,’ उनको प्रश्न छ, ‘ललिता निवास प्रकरणमा नम्बरी जग्गा लिएइका मालपोतमा गएर कागजपत्र सबै हेरेका पैसा दिएर जग्गा किनेका मानिसहरु र कर्मचारीहरु जहाजको सिटबाट समातिएर थुनिए निणर्यकर्ताहरुलाई सुनपानी छर्किए जसरी चोख्याएर पठाइयो। सरकारको सुशासन यहि हो र ? सुन प्रकरणमा सत्तारुढ दलका नेताहरुको नाम आउने वित्तिकै सरकार सुस्तायो के सरकारले दिन खोजेको सुशासन यहि हो?’

त्यस्तै सभापति लामिछानेले सुन प्रकरणमा छानविन गरिरहेको सिआइबीलाई विश्वास गर्न सकिने भए पनि असामान्य रुपमा सक्रिय सरकारका संयन्त्रप्रति भरोसा गर्न नसकिने उल्लेख गरे। ‘सीआइबीको अनुसन्धानलाई विस्वास नगर्ने भन्ने कुरै छैन्। मात्र यति होकि सीआइबीलाई आफ्नो काम निष्पक्षतापूर्वक गर्नको निमित्त सरकारले कुनै पनि दबाव दिने त होइन शंका सीआइबी प्रति होइन शंका हाम्रो संयन्त्र प्रति हो,’ उनको भनाइ छ, ‘जुन बारम्बार दोषीहरुलाई उम्काउन कुनै न कुनै भूमिका निर्वाह गरिरहेको हुन्छ।’