इतिहासको रथलाई उल्टो दिशामा लैजाने षड्यन्त्र भइरहेको छ : प्रचण्ड

काठमाडौँ– प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल प्रचण्डले परिवर्तन नरुचाउने तत्त्वहरूले इतिहासको रथलाई उल्टो दिशामा लैजाने षड्यन्त्र गरिरहेको आरोप लगाएका छन्। शनिवार ‘जनतासँग माओवादी विशेष रूपान्तरण अभियान’को पार्टी कार्यालय पेरिसडाँडाबाट अभियानको उद्घाटन गर्दै अध्यक्ष प्रचण्डले यस्तो दाबी गरेका हुन्।

‘परिवर्तनलाई नरुचाउनेहरूले इतिहासको रथलाई उल्टो दिशामा लैजाने षड्यन्त्र गरिरहेका छन्,’ उनले भने, ‘सरकारविरुद्ध घेराबन्दी गर्ने काम भइरहेको छ। सरकारको कामबाट जनताको ध्यानबिमुख गर्ने काम भइरहेका छन्। यो घेराबन्दीले झनै सबल र सक्षम भएर आन्दोलनमा अघि बढ्नै पर्ने कार्यभार छ। हाम्रो अस्तित्व हामीमै निर्भर छ।’

आफू नेतृत्वमा रहेको सरकारविरुद्ध घेराबन्दी भइरहेको उनको भनाइ थियो। यसपछि पनि उनले सार्वजनिक रूपमा नै सरकारविरुद्ध घेराबन्दी भइरहेको बताउँदै आएका थिए।

इतिहासले सम्झिने गरी सरकारले एकपछि अर्को राम्रो गरेको राम्रा गरेको तर सरकारलाई घेराबन्दीमा पारिएको उनको भनाइ छ। जनताका आसा, अपेक्षा र सुझावसमेत ग्रहण गर्न उनले निर्देशन दिए।

‘अभियानले जन सम्बन्ध कमजोर हुँदै जाने परिस्थितिलाई चिर्ने छ। आजको युगको नेतृत्व गर्ने विचार निर्माणको आधार तयार पार्ने छ,’ उनले भने, ‘सरकारले सामाजिक न्यायको प्रत्याभूति, शुसासन र विकासलाई मुख्य प्राथमिकता दिएको छ। सरकारले इतिहासले नै सम्झिनेगरी एकपछि अर्को काम गरिरहेको छ। सरकारले गरेका राम्रा काम जनतासम्म पुगेका छैनन्। यसले सरकार र जनताको सम्बन्ध बढाउने छ।’