भारतले आठौँ पटक जित्यो एसिया कपको उपाधि

काठमाडौँ- एसिया कपको उपाधि भारतले जितेको छ। आइतबार भएको फाइनल खेलमा श्रीलंकाले दिएको ५१ रनको झिनो लक्ष्य पछ्याएको भारतले ६.१ ओभरमा नै पूरा गर्दै कपको उपाधि जितेको हो। श्रीलंकाको लक्ष्य भेट्टाउन भारतले कुनै पनि विकेट गुमाउनु परेन।

यसअघि ब्याटिङ गरेको श्रीलंका भारतका तीव्र गतिका बलर मोहम्मद सिराजको उत्कृष्ट बलिङमा ५० रनमै अलआउट भएको थियो।

कोलम्बोमा रहेको आर प्रेमदासा क्रिकेट स्टेडियममा टस जितेर पहिले ब्याटिङ गरेको श्रीलंका १५.२ ओभरमा ५० रन मात्र जोड्न सकेको थियो।

खेलमा भारतका लागि सिराजले ७ ओभरमा २१ रन खर्चिएर ६ विकेट लिए। ओडीआई करियरमा सिराजको यो उत्कृष्ट बलिङ फिगर हो। हार्दिक पाण्ड्याले २.२ ओभरमा तीन रन खर्चिँदै तीन विकेट लिए। जस्प्रित बुमराहले १ विकेट लिएका थिए।

श्रीलंकाका लागि कुशल मेन्डिसले १७ तथा दुशान हेमन्थाले १३ रन बनाए। श्रीलंकाका अन्य ब्याटरले दोहोरो अंकमा रन बनाउन सकेनन्।

एसिया कपको सर्वाधिक सफल टोली भारत आठौं पटक च्याम्पियन बनेको हो। श्रीलंकाले गत संस्करणमा पाकिस्तानलाई फाइनलमा पराजित गरी उपाधि जितेको थियो।

५० रन श्रीलंकाको एकदिवसीय इतिहासकै दोस्रो कम योगफल हो। एकदिवसीय खेलमा श्रीलंकाको सबैभन्दा कम स्कोर भने २०१२ मा दक्षिण अफ्रिकाविरुद्ध बनाएको ४३ रन हो।

भारतले सन् १९८४, १९८८,१९९१, १९९५, २०१०, २०१६, २०१८ र २०२३ मा गरी ८ पटक एसिया कपको उपाधि जितेको छ। ऊ तीन पटक उपविजेता बनेको छ। श्रीलंकाले सन् १९८६, १९९७, २००४, २००८, २०१४ र सन् २०२२ मा यो कपको उपाधि जितेको थियो। श्रीलंका ६ पटक विजेता र उपविजेता पनि ६ पटक नै बनेको छ।

सन् २००० र २०१२ मा भने यो उपाधि पाकिस्तानको पोल्टामा परेको थियो। ऊ तीन पटकसम्म उपविजेता बनेको छ। बंगलादेश एसिया कपमा तीन पटक उपविजेता बनेको छ।