ओलीको नीतिविपरीत गण्डकीमा प्यानलै बनाएर चुनाव

पोखरा- नेकपा एमालेका अध्यक्ष केपी शर्मा ओलीको नीतिविपरीत एमाले गण्डकीमा प्यानलै बनाएर चुनाव हुने भएको छ।

प्रदेश कमिटीको प्रथम अधिवेशनमा अध्यक्ष पदका आकांक्षी मायानाथ अधिकारी नेतृत्वमा समूहले प्यानल बनाएरै प्रतिस्पर्धा गर्ने भएको छ।

अधिकारी टोलीले उपाध्यक्ष, सचिव, उपसचिवमा उठाउने उम्मेदवार तयार पारेको हो ।

एमाले केन्द्रीय सदस्य राजीव पहारीका अनुसार अधिकारी प्यानलबाट उपाध्यक्ष नवलपुरका बाबुराम विक, सचिव कास्कीका रश्मि आचार्य, उपसचिव म्याग्दीका सन्तोष रावल र कास्कीकी मीना गुरुङ उम्मेदवार बन्नेछन्।

अधिकारीका प्रतिस्पर्धी नवराज शर्मा र सचिवमा धनञ्जय दवाडी उम्मेवार हुने पक्कापक्की छ। तर पूरै समूह सार्वजनिक भएको छैन।

गण्डकीमा पूर्वमूख्यमन्त्रीद्वय पृथ्वी सुब्बा गुरुङ (पीएस) र खगराज अधिकारी (केआर)को दुई समूह छ। पीएस समूहबाट नवराज शर्मा र केआर समूहबाट अधिकारी चुनावी मैदानमा होमिने भएका हुन्।

यी दुई समूहबाट प्यानल बन्ने सम्भावित परिदृश्य देखेरै नेतृत्वले प्यानल बनाउन बन्देज लगाएको एमालेकै नेताहरू बताउँछन्।

अधिवेशन उद्घाटनका क्रममा एमाले सचिव तथा गण्डकी प्रदेश ईन्चार्ज गोकर्ण विष्टले सकेसम्म सर्वसम्मत नेतृत्व चयन गरिने जिकिर गरेका थिए।

अन्तिम अवस्थामा पनि सहमति नभए ‘आन्तरिक जनवादको अभ्यास’ गर्ने उनको भनाइ थियो।

‘सहमति कायम गर्न सक्यौं भने त्यो पार्टीको हितमा हुन्छ। त्यसका लागि पहल पनि भइरहेको छ,’ उनले भनेका थिए, ‘त्यसो हुन नसके लोकतान्त्रिक अभ्यास गर्छौं।’

चुनावी प्रतिस्पर्धा गर्न पाइने भए पनि प्यानल बनाएर चुनाव लड्न भने नपाइने विष्टले पारेका थिए।

‘प्यानल खडा गरेर चुनाव लड्न पाईँदैन, दिईँदैन,’ विष्टले भनेका थिए,‘अस्वस्थ प्रतिस्पर्धा गर्ने, प्यानल बनाएर चुनाव लड्ने अधिकार कसैलाई दिईँदैन र त्यो छुट पनि छैन।’

पार्टीका अध्यक्ष केपी शर्मा ओली चुनावी प्रतिस्पर्धाको पक्षमा थिएनन्। एमालेको चितवन महाधिवेशनमा उनले सर्वसम्मत अध्यक्ष बन्न चाहेका थिए। सर्वसम्मत बन्नका लागि उनले अधिवेशनलाई लम्बाइदिएका थिए।

पछि कुनै हालतमा पनि आफू सहमतिमा ओलीलाई अध्यक्ष मान्न तयार नभएको बरु चुनावबाट पराजित हुन तयार रहेको भीम रावलले बताउन थालेपछि चुनाव भएको थियो। आफूविरुद्ध चुनावी प्रतिस्पर्धा गरेका रावललाई ओलीले राजनीतिको किनारामा पुर्‍याएका छन्। उनलाई पार्टीले कुनै पनि जिम्मेवारी दिएको छैन।

यसअघि भएका प्रदेशहरूको अधिवेशनमा ओलीले सहमतिमा नेतृत्व छान्न प्रतिनिधिहरुलाई खुला रूपमा आग्रह गर्दै आएका थिए। तर सहमतिमा नेतृत्व छान्न नसकेपछि बागमतीको अधिवेशनका बेला ओलीले कैलाश ढुंगेलको पक्षमा मत मागेका थिए। अन्ततः उनी नै विजयी बनेका छन्।

आफूले भनेअनुसार सहमतिमा चुनावी प्रतिस्पर्धाको विषयलाई नेताहरूले नमानेपछि कुनै एक पक्षको प्रचार गरेर अर्को पक्षलाई रोक्ने ओलीको रणनीति छ। तर आफूले भने प्यानलका पक्षमा मत माग्ने तर प्यानल बनाउन नदिइने भन्ने ओलीको नीति विरोधाभासपूर्ण देखिन्छ।

गण्डकी अधिवेशन : पीएस र केआरको शक्तिपरीक्षण, प्यानलगत अभ्यासमा ओलीको बन्देज