त्रिवि विज्ञान-प्रविधिका १३ शोधार्थीलाई केसीआरई अनुदान प्रदान

काठमाडौँ– त्रिभुवन विश्वविद्यालयअन्तर्गत विज्ञान तथा प्रविधि अध्ययन संस्थानका उत्कृष्ट १३ शोधार्थीलाई केसीआरआई उत्कृष्ट शैक्षिक अनुदान प्रदान गरिएको छ।

संस्थान र जल तथा मौसम विज्ञान केन्द्रीय विभागको संयुक्त आयोजनामा उनीहरूलाई अनुदान प्रदान गरिएको हो।

कीर्तिपुरस्थित काठमाडौँ सेन्टर फर रिर्सच एन्ड एजुकेसन (केसीआरई)को सभाकक्षमा संस्थानअन्तर्गतका विभाग तथा क्याम्पस उत्कृष्ट शोधार्थीलाई ८० हजार रुपैयाँको उक्त अनुदान प्रदान गरिएको हो।

त्रिुभवन विश्वविद्यालय र चाइनिज एकेडमी अफ साइन्सेसबीच सन् २०१४ मा सहमति भई उक्त अनुदान प्रदान गर्न थालिएको हो। हालसम्म १३० जना शोधार्थी विद्यार्थीहरुले उक्त अनुदान प्राप्त गरिसकेका छन्।

उत्कृष्ट शोधार्थी अनुदान प्राप्त विद्यार्थीहरुमा वातवरण केन्द्रीय विभागकी अन्जुली मुल्मी, खाद्य प्रविधि केन्द्रीय विभागकी स्वेच्छा थापामगर, बायोटेक्नोलोजी केन्द्रीय विभागकी रोजीना पाण्डे, रसायनशास्त्र केन्द्रीय विभागका विद्यार्थीद्वय सोनिया जोशी र सीता खड्का, भौतिकशास्त्र केन्द्रीय विभागका सागर पाण्डे र गणित केन्द्रीय विभागका सन्देश ठकुरी छन्।

यस्तै, प्राणीशास्त्र केन्द्रीय विभागकी अन्जु कर्माचार्य, तथ्याङ्कशास्त्र केन्द्रीय विभागकी श्रीषा रिजाल, माइक्रोबायोलोजी केन्द्रीय विभागका लक्ष्मी पाण्डेले पनि उक्त अनुदान पाए।

भूगर्भशास्त्र केन्द्रीय विभागका नागेश रिजाल, वनस्पतिशास्त्र केन्द्रीय विभागका विनिका माथे र जल तथा मौसम विज्ञान केन्द्रीय विभागका स्मृति अधिकारीले पनि ८० हजार राशिको अनुदान प्राप्त गरेका छन्।

त्रिभुवन विश्वविद्यालयका शिक्षाध्यक्ष प्रा.डा शिवलाल भुसालले उत्कृष्ट शोधार्थी विद्यार्थीहरुलाई अनुदान प्रदान गरेका थिए।

उत्कृष्ट शोधार्थी विद्यार्थीहरुलाई अनुदान हस्तान्तरण गर्ने कार्यक्रममा संक्षिप्त मन्तव्य व्यक्त गर्दै शिक्षाध्यक्ष भुसालले विज्ञानका उत्कृष्ट वैज्ञानिक विद्यार्थीहरुले विश्वविद्यालयको गरिमा बढाउने र भविष्यमा थप उत्कृष्ट कार्य गर्ने विश्वास व्यक्त गरे।

विज्ञान तथा प्रविधि अध्ययन संस्थानका डीन प्राडा विनिल अर्यालले चाइनिज एकेडमी अफ साइन्सेस विश्वकै उत्कृष्ट वैज्ञानिकहरु निर्माण गर्ने संस्था रहेको र नेपालमा विज्ञान शिक्षाको विकास र गुणस्तरका लागि सहयोग गर्दै आइरहेकोमा धन्यवाद ज्ञापन गरे।

आगामी दिनमा त्रिभुवन विश्वविद्यालयले अन्तराष्ट्रिय शैक्षिक संस्थाहरुसँग सहकार्य गरी विद्यार्थीहरुलाई विविध प्रकारका आर्थिक एवम् प्राज्ञिक सहयोगहरु उपलब्ध गराउने उनको भनाइ थियो।

जल तथा मौसक विज्ञान केन्द्रीय विभागका विभागीय प्रमुख प्रा.डा दीपक अर्यालले सबै विद्यार्थीहरुमा शुभकामना व्यक्त गरे।

जल तथा मौसम विज्ञान केन्द्रीय विभागका सहप्राध्यापक तथा काठमाडौँ सेन्टर फर रिसर्च एन्ड एजुकेसनका उपनिर्देशक डा विनोद दवाडीका अनुसार विद्यार्थीहरुले प्राप्त गर्ने रु ८० हजारमध्ये ६० प्रतिशत अर्थात ४८ हजार रुपैयाँ पुरस्कृत भएको दिन र बाँकी २० प्रतिशत शोधकार्य ९ महिनाभित्र सम्पन्न गरी सम्बन्धित विभागको सिफारिसमा र अन्तिम २० प्रतिशत सम्बन्धित शोधार्थीले राष्ट्रिय तथा अन्तराष्ट्रिय जर्नलमा अनुसन्धानात्मक लेख २ वर्षभित्र प्रकाशित गरिसकेपछि प्रदान गरिने प्रावधान रहेको जानकारी दिए।

केसीआरई अनुदानबाट पुरस्कृत हुन पहिलो चरणमा शोधकार्य अघिको सेमेस्टरमा उच्चतम अंक प्राप्त गरेको र उत्कृष्ट शोधप्रस्तावना भएका ३ जना विद्यार्थीहरुलाई सम्बन्धित विषयको विभागीय अनुसन्धान समितिबाट सिफारिस गरिएको थियो। यसरी सम्बन्धित विभागबाट सिफारिस भई आएका विद्यार्थीहरुमध्येबाट सर्वोत्कृष्ट विद्यार्थीलाई विज्ञान तथा प्रविधि अध्ययन संस्थानले गर्ने छनौट गरेको थियो।