करको दर हेरफेरको आरोप लागेका पूर्वनासुविरुद्ध सवा २ करोडको मुद्दा

काठमाडौँ- चालु आर्थिक वर्षको बजेटमा करको दर हेरफेर गरेको आरोप लागेका पूर्व नायवसुब्बा रघुनाथ घिमिरेविरुद्ध भ्रष्टाचार मुद्दा दर्ता भएको छ। अख्तियार दुरुपयोग अनुसन्धान आयोगले आइतबार विशेष अदालतमा पूर्वनासु घिमिरेविरुद्ध २ करोड १४ लाख ४६ हजार रुपैयाँ बिगो मागदाबी गर्दै मुद्दा दायर गरिएको जानकारी दिएको हो।

घिमिरे पदमा रहँदा गैरकानुनी सम्पत्ति आर्जन गरेको आरोपमा भ्रष्टाचार मुद्दा दायर गरिएको हो। २०५२ कात्तिक २८ गते सरकारी सेवामा प्रवेश गरेका घिमिरेले २०७५ फागुन १ मा राजीनामा दिएर निजामति सेवाबाट बाहिरिएका थिए।

सेवामा रहँदा ७ करोड ३९ लाख ६२ हजार ९८४ रुपैयाँ ६७ पैसा खर्च गरेको र यो अवधिमा उनको आम्दानी ५ करोड २५ लाख १६ हजार ३ सय २७ रुपैयाँ ४४ पैसा मात्र वैध देखिएको अख्तियारले दायर गरेको आरोपपत्रमा उल्लेख छ।

आम्दानीभन्दा बढी देखिएको सम्पत्तिलाई नै अख्तियारले गैरकानुनी सम्पत्तिका रुपमा किटान गरेर २ करोड १४ लाख ४६ हजार ६५७ रुपैयाँ २४ पैसा बिगो‚ बिगो बराबर जरिवाना र गैरकानुनी सम्पत्तिबाट बढाइएकोअचल सम्पत्ति जफत गर्न अख्तियारले मागदाबी गरेको छ।

गैरकानुनी सम्पत्ति आर्जनकै लागि पदको दुरुपयोग गरी उनले आफ्नी श्रीमतीलाई भन्सार एजेन्ट बनाएको पनि अनुसन्धानका क्रममा खुलेको बताइएको छ।