सराङकोटमा साताभित्रै खुल्दैछ प्याराग्लाइडिङ

पोखरा- पोखरा महानगरपालिका वडा नम्बर १८ स्थित सराङ्कोटको बहाकोटमा फेरि प्याराग्लाइडिङ सञ्चालन हुने भएको छ।

पोखरा क्षेत्रीय अन्तराष्ट्रिय विमानस्थल सञ्चालनसँगै पोखरा-२४ माङ्द्रेढुङ्गामा सरेको प्याराग्लाइडिङ पुन: सराङकोटको बहाकोटमा नै हुने भएको हो।

नेपाल हवाई खेलकुद संघ (ना) प्रवक्ता कृष्ण भण्डारीले बहाकोटबाट एक साताभित्रै प्याराग्लाइडिङ सञ्चालन हुने जानकारी दिएका हुन्।

गत वर्ष पुसमा पोखरा क्षेत्रीय अन्तर्राष्ट्रिय विमानस्थल सञ्चालनमा आएसँगै प्राविधिक कारण देखाउँदै नागरिक उड्डयन प्राधिकरणले सराङकोटको प्याराग्लाइडिङ रोकिदिएको थियो।

यसपछि यहाँको प्याराग्लाइडिङ पोखरा-२४ माङ्द्रेढुङ्गामा सारिएको थियो।

तर अब बहाकोटबाट उडेर पोखरा-२३ कात्रेपामेमा नै ल्यान्डिङ गर्न प्राधिकरणले अनुमति दिने भएको हो।

खपौदीमा नजिकै ताल रहेको र चङ्खपुरमा धान खेती भएका कारण कात्रेपामे जान भनिएको छ। यसमा ना सहमत भएको प्रवक्ता भण्डारीले जानकारी दिए।

‘सुरक्षित उडानका लागि नियमित रुपमा अनुगमन गर्दै प्याराग्लाइडिङमा रहेका हरेक समस्याहरु समाधान गर्न क्यान तयार छ,’ प्राधिकरणका निर्देशक राजु श्रेष्ठले भने।

नागरिक उड्डयन प्राधिकरणका फ्लाइट सेफ्टी विभाग प्रमुख समेत रहेका निर्देशक राजु श्रेष्ठले पोखरालाई ताल र हिमालको मात्रै परिचय नभई पोखराले प्याराग्लाइडिङमा समेत पहिचान बनाएकाले यसलाई सहज बनाउन प्राधिकरणले सहयोग गर्ने बताए।

प्याराग्लाइडिङ नहुँदा सराङ्कोटको पर्यटनमा असर पारेको, सुरक्षित र पोखराको पर्यटनमा भएको कमी आएको ना अध्यक्ष सुनील भट्टराईको भनाइ छ। पोखरा आउने ५० देखि ६० प्रतिशत पर्यटकहरु साहसिक पर्यटनका लागि आउने भएकाले यसलाई सहज बनाउनुपर्ने उनको भनाइ छ।

‘सुरक्षित उडानका लागि नियमित रुपमा अनुगमन गर्दै प्याराग्लाइडिङमा रहेका हरेक समस्याहरु समाधान गर्न क्यान तयार छ,’ प्राधिकरणका निर्देशक राजु श्रेष्ठले भने।

कार्यक्रममा प्रमुख अतिथिसमेत रहेका क्यानका निर्देशक श्रेष्ठले पोखरेली प्याराग्लाइडिङ उद्योगले सार्थक पहिचान बनाएको बताएका थिए।

नवौं राष्ट्रिय खेलकुदमा भएको दुर्घटनाका कारण स्थगित सोलो (एकल) उडान अनुमतिको विषयमा क्यानले अध्ययनलाई अन्तिम चरणमा पुर्‍याएको पनि बताइएको छ। सोलो उडानले पर्यटनमा वृद्धिमा सहयोग हुने आशा उनले व्यक्त गरे।

‘यो हाम्रो लागि महत्वपूण विषय थियो। हामीले क्षेत्र विस्तारको विषयलाई लिएर क्यानसँग धेरै पटक छलफल चलायौं। क्यानको सहकार्यमा धेरै अध्ययन समेत भयो,’ नाका अध्यक्ष भट्टराईले भने, ‘ना र क्यानले नेपालको प्याराग्लाइडिङलाई सुरक्षित गन्तव्यको रुपमा स्थापित गर्न हामीले धेरै प्राविधिक लगायतका विषयमा अध्ययन गरेका छौं। अब सहज हुने आशा छ।’

यसबैबीच नेपाली साहसिक खेलकुद प्याराग्लाइडिङको व्यवसायिक छाता संस्था नेपाल हवाई खेलकुद संस्था (ना) २०औं वर्षमा प्रवेश गरेको छ।

यसै अवसरमा पोखराको प्याराग्लाइडिङलाई व्यवस्थित बनाउन नेपाल नागरिक उड्ययन प्राधिकरण (क्यान)ले महत्वपूर्ण सहयोग गरेको भन्दै क्यानलाई सम्मान गरिएको छ।

कार्यक्रममा संस्थाका महासचिव खेमराज आचार्यले नाको वार्षिक प्रतिवेदन प्रस्तुत गर्दै आर्थिक वर्ष २०८०/०८१ का लागि विभिन्न २२ वटा कार्यक्रमहरू प्रस्तुत गरिएको बताए।

नाकामा ६२ वटा व्यावसायिक कम्पनी र ३९९ जना प्याराग्लाइडिङ पाइलट आबद्ध छन्।