इजरायलले हस्तान्तरण गर्‍यो ५ नेपाली विद्यार्थीको शव

काठमाडौँ- प्यालेस्टाइनी इस्लामिक समूह हमासको आक्रमणमा परी इजरायलमा ज्यान गुमाएका ५ जना नेपाली विद्यार्थीको शव इजरायलले हस्तान्तरण गरेको छ।

आइतबार उनीहरूको शव इजरायलस्थित नेपाली राजदूतावासलाई हस्तान्रण गरेको हो।

सिडट निजेभ एग्रिकल्चर सेन्टर अन्तर्गत किब्बुज अलुमिममा प्रशिक्षणरत विद्यार्थीहरूमाथि आक्रमण हुँदा १० जना नेपाली विद्यार्थीको ज्यान गएको थियो। तीमध्ये ५ नेपालीको शव प्राप्त भएको दूतावासले जानकारी दिएको छ।

नारायणप्रसाद न्यौपाने, लोकेन्द्रसिंह धामी, गणेशकुमार नेपाली, दिपेशराज विष्ट र आशिष चौधरीको शव दूतावासले प्राप्त गरेको हो।

बाँकी ५ जनाको पनि शव प्राप्त हुने क्रममा रहेको दूतावासको भनाइ छ।

प्राप्त शवलाई ढिलो नगरी नेपाल फर्काइने दूतावासको भनाइ छ।

इजरायलमा एक जना नेपाली विद्यार्थी विपीन जोशी सम्पर्कविहीन छन्।

उनलाई हमास समूहले बन्धक बनाएको आशंका गरिएको छ।

जोशीसँगै रहेका नेपाली विद्यार्थीहरूका अनुसार उनलाई केही व्यक्तिहरूले लिएर गएका थिए। त्यसयता उनीसँग सम्पर्क हुन सकेको छैन।

हमासको आक्रमणमा परी घाइते भएका चार जनामध्ये दुई जना अस्पतालबाट डिस्चार्ज भइसकेका छन्।

एक जना नेपाल फर्किएको र एक जना दूतावासकै हेरचाहमा छन्। दूतावासका अनुसार दुई जना स्थानीय अस्पतालमा उपचाररत छन्।