सहर भित्रिए भेडाच्यांग्रा, आकासियो मूल्य

पोखरा-  दसैँ नजिकिएसँगै सहरमा भेडाच्याङ्ग्रा भित्रिएका छन्। व्यवसायीले करिब ४५०० भेडा च्यांग्रा पोखरा ल्याएका छन्।

भेडाच्यांग्राको मूल्य आकासिएर आएको व्यापारी नै स्वीकार गर्छन्। लेकाली भेडाच्यांग्राहरुले लेकको जडीबुटी खाएको हुन्छ भने मान्यताका कारण बढी मूल्य पर्ने गरेको छ।

भेडाच्यांग्रा पालन वर्तमान समयमा घट्दै गएकाले मागजति पूर्ति हुन नसक्दा पनि मूल्य बढी पर्न थालेको हो।

पोखरा आइपुगेका भेडाच्यांग्राको मूल्य ५० हजारसम्म रहेको व्यवासायी प्रकाश कुँवर बताउछन्। कुँवरका अनुसार मुस्ताङमा खरिद गर्दा नै मूल्य बढी परेको कुँवर बताउँछन्।

पोखरामा पहिलो चरणमा आफूहरुले माथिल्लो मुस्ताङ लोमान्थाङ क्षेत्रबाट ३ सय ६५ वटा भेडाच्याङग्रा बिक्रीको लागि ल्याइएको छ। मुस्ताङबाट आफूहरुले भेडाच्याङग्राको स्वास्थ्य परीक्षण गरी ८ दिनमा पोखरामा ल्याइपुर्‍याएको पोखरा जिरोस्थित बिसौनी खाजा घरका सञ्चालक उमनाथ तिमिल्सिनाले बताए।

पहिलो चरणमा ल्याएको मुस्ताङका भेडाच्याङग्रा २४ देखि २६ केजीका भएको बताउँदै खड्काले हाल आफूहरुले ७० हजारसम्ममा च्याङग्रा बिक्री गरेको बताए। च्यांग्राको मासु प्रतिकेजी २५ सय रुपैयाँमा बिक्री गर्न सुरु गरेको उनले बताए।

मुस्ताङका स्थानीय किसानले हुर्काएका भेडाच्याङग्रा यो वर्षको लागि बिक्री गर्ने उद्देश्यले मुस्ताङबाट हालसम्म ५ हजार ७ सय वटा बाहिरिएको भेटेरिनरी अस्पताल तथा पशु सेवा केन्द्र मुस्ताङका डा. लालमणि अर्यालले बताए।

केही दिनदेखि सुरु भएको भेडाच्याङग्राको स्वास्थ्य परीक्षण हालसम्म जारी रहेको उनको भनाइ छ। प्रति भेडाच्याङग्राको स्वास्थ्य परीक्षण गर्दा १५ रुपैया शुल्क तिरेको व्यवसायीले बताए।

उक्त भेडाच्याङग्राको स्वास्थ्य हालको अवस्थामा राम्रै भए पनि केही दिन पानी परेकोले लेकबाट बेसीमा झार्दै पोखरालगायतका स्थानमा पुग्दा केही भेडाच्याङग्राको नाकबाट सिंगान आउन सक्ने डा.अर्यालले बताए।

मुस्ताङको जोमसोमबाट म्याग्दी हुँदै पोखरा, काठमाडौं, चितवनलगायतका क्षेत्रमा दसैं लक्षित हुने गरी यो वर्ष करिब ७ हजार भेडाच्याङग्रा बिक्रीको लागि मुस्ताङबाट बाहिरिएको व्यवसायीहरुले बताएका छन्।

यो वर्ष मुस्ताङबाट करिब ७ हजार जति डोल्पा क्षेत्रमा उत्पादन भएका भेडाच्याङग्रा मुस्ताङबाट वेनी हुँदै पोखरा पुग्न थालेको भेटेरिनरी अस्पताल तथा पशु सेवा केन्द्र मुस्ताङका निमित्त कार्यालय प्रमुख ऋषिराम पोखरेलले बताए।

यो वर्षको भेडाच्याङग्राको मूल्य बढ्नुमा मुस्ताङको कोरोना नाका दसैं अगाडि खोल्ने सम्भावना नभएको कराण रहेको छ।

पछिल्लो समयमा मुस्ताङ क्षेत्रमा पर्यटकहरुको आगमन राम्रो भएसँगै भेडाच्याङग्रा मुस्ताङमै खपत हुन थालेकोले दसैं तिहारको अवसरमा पोखरालगायतका क्षेत्रमा आफूहरुले पालन गरेका भेडाच्याङग्रा केही कम पठाउन थालिएको मुस्ताङका भेडाच्याङग्रा व्यवसायी आङग्याल गुरुङले बताए।

उपल्लो मुस्ताङ (लोमाङथाङ) का गुरुङले यो वर्ष करिब ६ सय वटा भेडाच्याङग्रा पालना गरे पनि दसै लक्षित २५० वटा मात्र बिक्री गर्ने योजना बनाएका छन्। भेडाच्याङग्रा खरिद गर्न गाउँमा आएकाहरुले सस्तो मूल्यमा खोजेका कारण उनले आफैं प्रत्यक्ष उपभोक्तालाई बिक्री गर्ने बताए।