राहतका लागि पठाइयो ११ हजार थान त्रिपाल

काठमाडौँ- जाजरकोट र रुकुम पश्चिममा भूकम्पपीडितको राहतका लागि ११ हजार थान त्रिपाल पठाइएको छ। गृह मन्त्रालय, सशस्त्र प्रहरी बल र युनिसेफले ११ हजार ६१ थान त्रिपाल पीडितको राहतका लागि पठाइएको मन्त्रालयले जानकारी दिएको छ।

यस्तै ब्ल्याङकेट ११०० थान र स्लिपिङ ब्याग पनि ११०० थान पठाइएको छ। ७ सय थान टेन्ट पनि पठाइएको गृहमन्त्री नारायणकाजी श्रेष्ठको सचिवालयले जानकारी दिएको छ।

विभिन्न राहत सामाग्री लिएर पुगेका गृहमन्त्री श्रेष्ठले उद्धार, खानपिन, बसोबास, राहत तथा उपचारमा कुनै कमी हुन नदिइने बताएका छन्। उद्धारको काम लगभग सकिएकोले अब राहत, बसोबास, खानपिन र उपचारमा केन्द्रित हुनु जरुरी रहेको श्रेष्ठले बताए।

पीडित र प्रभावितको समग्र जानकारी लिएपछि उपस्थितहरूलाई सम्बोधन गर्दै उपप्रधानमन्त्री श्रेष्ठले नगद एवम् जिन्सी राहत वितरण, खानपिन, बसोबास र उपचारमा कुनै कमी हुन नदिइने तथा पुनर्निर्माणको योजना तत्काल बनाइने समेत बताए।

उपप्रधानमन्त्री श्रेष्ठ नेतृत्वको टोली यसपछि पश्चिम रुकुम पुग्नेछ। टोलीमा भौतिक पूर्वाधार तथा यातायातमन्त्री प्रकाश ज्वाला, स्वास्थ्यमन्त्री मोहनबहादुर बस्नेत, ऊर्जामन्त्री शक्ति बस्नेत, सांसद एवम् माओवादी केन्द्रका उपमहासचिव जनार्दन शर्मालगायत छन्।