कार्यकक्षबाटै कुश्माका प्रमुख प्रशासकीय अधिकृत पक्राउ, १ करोड घुस लिएको आरोप

पर्वत- पर्वतको कुश्मा नगरपालिकाका प्रमुख प्रशासकीय अधिकृत उदयबहादुर पराजुली पक्राउ परेका छन्। बुधबार कार्यकक्षबाटै उनलाई प्रहरीले पक्राउ गरेको कुश्मा प्रहरीले जानकारी दिएको छ।

जिल्ला प्रहरी कार्यालय कास्कीले पक्राउ गरिदिन पर्वत प्रहरीलाई पत्र पठाएपछि उक्त पत्रका आधारमा पराजुलीलाई पक्राउ गरिएको कुश्मा प्रहरीले जानकारी दिएको छ। पराजुलीलाई पोखरा पठाइने छ।

मित्रमिलन बचत तथा ऋण सहकारीमा बचत गरेको रकम अपचलन गरेको आरोपमा पक्राउ परेका अध्यक्ष रमण पौडेल र व्यवस्थापक किरण अधिकारीले सहकारीको कार्यक्षेत्र विस्तार गर्दा आफूहरूले रजिष्ट्रार पराजुलीलाई घुस खुवाएको बयान दिएपछि सोही बयानका आधारमा छानबिन गर्नका लागि पराजुलीलाई पक्राउ गरिएको हो।

तत्कालीन अवस्थामा प्रमुख रजिष्ट्रार रहेका पराजुलीलाई १ करोड १५ लाख रूपैयाँ घुस दिएको बयान उनीहरूले भनेका छन्। सर्वसाधारणले बचत गरेको २६ करोड रूपैयाँ अपचलन आरोपमा प्रहरीले पौडेल र अधिकारीलाई पक्राउ गरेको थियो।

सहकारीले पोखरासहित स्याङ्जाको आँधीखोला गाउँपालिकामा सेवा केन्द्र स्थापना गरेको थियो। सहकारीले स्थानीय तहभन्दा बाहिर शाखा वा सेवा केन्द्र सञ्चालन गर्दा सहकारी रजिष्ट्रारको कार्यालयबाट अनुमति लिनुपर्छ।

पराजुली २०६९ भदौ दोस्रो सातासम्म सहकारी रजिष्ट्रारको कार्यालय गण्डकीका प्रमुख थिए। सहकारी रजिष्ट्रारका रूपमा झण्डै २ वर्ष उनी पोखरा बसेका थिए। उनी रजिष्ट्रार भएकै बेला मित्रमिलन सहकारीले स्याङ्जामा कार्यक्षेत्र विस्तार गरेको थियो।