६ यात्री बोकेको रुसी जहाज अफगानिस्तानमा दुर्घटना

काठमाडौँ-  अफगानिस्तानमा जहाज दुर्घटना भएको छ। भारतबाट उज्वेकिस्तान हुँदै मस्को गइरहेको जहाज दुर्घटनामा परेको हो।

रसियाली अधिकारीहरुका अनुसार जहाजमा ६ जना यात्रु थिए। चार्टर विमान अफगानिस्तानको बदाक्षन प्रान्तको पहाडी क्षेत्रमा दुर्घटना भएको टोलो समाचार संस्थाले जनाएको छ।

भारतबाट उडेको जहाज अफगानिस्तानको आकाशबाट राडारसँग सम्पर्कविच्छेद भएको थियो। अफगान प्रहरीले भने उक्त जहाज दुर्घटना भएको रिपोर्ट प्राप्त भएको भनेको समाचार संस्था रोयटर्सले जनाएको छ।

अधिकारीहरुका अनुसार उक्त जहाज चार्टर गरिएको एयर एम्बुलेन्स हो। त्यसमा ६ जना थिए।

अफगानिस्तानका प्रान्तीय प्रहरी प्रवक्ताले आइतबार उत्तरी अफगानिस्तान प्रहरीलाई बदाक्षन प्रान्तमा एक विमान दुर्घटना भएको रिपोर्ट प्राप्त भएको बताएका छन्। बदाक्षन प्रान्त सरकारका प्रवक्ता जबिहुल्लाह अमिरीका अनुसार दुर्घटनास्थलमा एक टोली पठाइएको छ।

दुर्घटनास्थल प्रान्तीय राजधानी फैजाबादबाट २०० किलोमिटर टाढा विकट क्षेत्रमा पर्दछ।

दुर्घटना भएको क्षे चीन, ताजिकिस्तान र पाकिस्तानको सीमा क्षेत्रमा पर्छ। यद्यपि उक्त जहाज दुर्घटना भएको स्थान यकिन गर्न नसकिएको भारतीय समाचार संस्था द हिन्दूले एएफपीलाई उद्धृत उल्लेख गरेको छ।

‘जहाज दुर्घटना भएको क्षेत्र अझै यकिन गर्न सकिएको छैन। हामीले त्यसतर्फ टोली परिचालन गरेका छौँ,’ अफगानिस्तानको प्रादेशिक सूचना विभागका प्रवक्ताले भनेका छन्, ‘हामीलाई स्थानीयहरूले बिहानको समयमा खबर गरेका हुन्।’ उनले थप जानकारी दिन अस्वीकार गरे।

भारतीय नागरिक उड्डयन मन्त्रालयले भने अफगानिस्तानमा जनवरी २० मा दुर्घटनामा परेको जहाज भारतीय नभएको बताएको छ। भारतका अनुसार यो जहाज मोरोक्कोमा दर्ता भएको हो।