सटर बन्द गरेर सडकमा [तस्बिरहरू]

काठमाडौँ- काठमाडौं महानगरपालिकाले न्युरोड क्षेत्रमा पार्किङ निषेध गरेपछि व्यापारीले सुरु गरेको आन्दोलनलाई दोस्रो दिन पनि निरन्तरता दिएका छन्।

न्युरोडका व्यापारीले पसल बन्द गरेर सडकमा प्रदर्शन गरेका हुन्। पार्किङ्ग बन्द गरे व्यापार नहुने र पार्किङ्ग खोल्नपर्ने न्युरोड क्षेत्रका व्यापारीको माग छ।

काठमाडौँ महानगरपालिकाले परामर्श नै नगरी पार्किङ निषेध गरेको व्यापारीहरूको दाबी छ। माघ ९ गतेदेखि धर्मपथ, जुद्धशालिकदेखि इन्द्रचोकतर्फको सडकखण्ड खिचापोखरी, प्युखा, महाबौद्ध, पाकोलगायतका क्षेत्रमा महानगरले पार्किङ निषेध गरेको छ। व्यवसायमा संकुचन आएको यस समयमा पार्किङ्ग निषेध गरेर आफूहरुको व्यवसाय अझ बढी मारमा परेको बताउँदै आएका छन्।

‘स्थानीय जनप्रतिनिधीहरु व्यवसायी संघ संस्था तथा स्थानीय समाजिक संघ संस्थाको मनोभावना विपरीत पार्किङ्गको उचित विकल्प प्रदान नगरी, यथेष्ठ समय पनि प्रदान नगरी जवरजस्ती रुपमा काठमाडौं महानगरको एकलौटी नियम लादने कुरामा कुनै पनि प्रजातान्त्रिक अभ्यास देखिँदैन,’ व्यवसायीले जारी गरेको विज्ञप्तिमा उल्लेख छ, ‘यस कारणले व्यवसायीक संघसंस्थाहरु, स्थानीय संघसंस्थाहरु तथा सरोकारवालाहरु संगठित भएर यस कार्यको घोर विरोध गर्दछौँ। साथै यथाशित बन्द भएको पार्किङ्ग व्यवस्थित तथा वैज्ञानिक ढंगले सञ्चालन गर्नहुन जोरदार माग गर्दछौं।’