वडा कार्यालयमा स्तनपान कक्ष

तुलसीपुर (दाङ)- कर्मचारी तथा सेवाग्राही आमालाई स्तनपान गराउन सहज होस् भन्ने उद्देश्यले दाङको तुलसीपुर उपमहानगरपालिका वडा नं. १३ को कार्यालयमा ‘स्तनपान कक्ष’ स्थापना गरिएको छ।

वडाले निर्माण गरेको नयाँ भवनमा स्तनपान कक्ष स्थापना गरिएको वडाध्यक्ष मोहन पौडेलले बताए। जिल्लाका एक सय वडामध्ये तुलसीपुर १३ ले पहिलो पटक उक्त स्तनपानकक्ष स्थापना गरेको अध्यक्ष पौडेलको भनाई छ।

“कर्मचारी र सेवाग्राहीका बच्चाबच्चीलाई स्तनपान गराउन निकै समस्या हुने गरेको छ, त्यसैले सेवाग्राहीमैत्री कार्यालयले यसरी स्तनपान कक्ष स्थापना गर्नुपर्छ”,उनले भने “त्यसैले हामीले वडामा पनि यो कक्ष स्थापना गरेका हौं।”

सुरक्षित मातृत्व तथा प्रजनन स्वास्थ्य अधिकार ऐन, २०७५ अनुसार सरकारी, गैरसरकारी, वा निजी संघसंस्थाले कार्यालयमा कार्यरत महिलालाई शिशु जन्मेको दुई वर्षसम्म कार्यालय समयमा आमाको दूध खुवाउनका लागि पनि स्तनपानकक्षको व्यवस्था गर्नुपर्ने व्यवस्था गरेको छ।

त्रिचालिस लाखको लागतमा उक्त भवन निर्माण भएको हो। नयाँ वडाको चारकोठे भवन निर्माण भएको हो। सोही वडामा ६ हजार जनसंख्या रहेको छ।