जनताका मुद्दामा सदनलाई केन्द्रित गराउन प्रमुख सचेतकहरू सहमत!

काठमाडौँ-  संसद्को आउँदो हिउँदे अधिवेशनका सन्दर्भमा प्रतिनिधिसभाका सभामुख देवराज घिमिरे र राजनीतिक दलका प्रमुख सचेतक तथा सचेतकबीच आज छलफल भएको छ।

सिंहदबारस्थित संसद् सचिवालयमा भएको छलफलमा माघ २२ गतेदेखि हुने अधिवेशनलाई व्यवस्थित र प्रभावकारी बनाउने विषयमा गृहकार्य भएको बैठकमा सहभागी नेकपा (एमाले) का सचेतक महेश बर्ताैलाले जानकारी दिए।

लामो समयदेखि थाँती रहेका विधेयकहरू निर्माण र जनसरोकारका विषयमा उचित सुनुवाइ हुनुपर्ने विषयमा आफूहरूले ध्यानाकर्षण गराएको उनको भनाइ छ।

छलफलमा उपसभामुख इन्दिरा राना, कानुन, न्याय तथा संसदीय मामिलामन्त्री धनराज गुरुङ, नेपाली काग्रेसका प्रमुख सचेतक रमेश लेखक, एमालेका प्रमुख सचेतक पदम गिरी, नेकपा (माओवादी केन्द्र) प्रमुख सचेतक हितराज पाण्डेलगायत सहभागी थिए।

‘अबको अधिवेशनबाट बढीभन्दा बढी विधेयक पारित हुन्छन् र कानुन बन्छन्,’ लेखकले भने, ‘संसद्को निश्चित क्यालेन्डर बनाएर अघि बढ्नेमा सबै दलको सहमति छ।’

एमालेका गिरिले अबको संसद्को अधिवेशनमा धेरैभन्दा धेरै विधेयक बनाउने र जनताका मुद्दामा सदनलाई केन्द्रित गराउनेबारे छलफल भएको जानकारी दिए।