संघ सरकारलाई बालेनको चेतावनी : काठमाडौँ महानगरको हितमा काम नगरे राजधानी सार्नुस्

काठमाडौँ- काठमाडौँ महानगरपालिकाका मेयर बालेन्द्र शाहले काठमाडौंको हितमा काम नगरे राजधानी सार्न संघीय सरकारलाई चेतावनी दिएका छन्। बिहीबार फेसबुकमा स्टाटस लेख्दै महानगरका मेयरले यस्तो चेतावनी दिएका हुन्।

‘कि काठमाडौंको हितमा काम गर्नुहोस्, कि सिंहदरबार अरु पालिकामा सार्नुहोस्। हामी काठमाडौं बासीलाई कुनै आपत्ति छैन,चाहे सिंहदरबार सार्नुस् कि राजधानी सार्नुस्। हामीलाई हाम्रो सम्पदा, संस्कृति, कला, सभ्यता चाहिन्छ, राजनीति हैन,’ मेयर बालेनले लेखेको स्टाटसमा भनिएको छ।

यसअघि मेयर बालेन्द्र शाहले काठमाडौँका विभिन्न स्थानमा अतिक्रमित भूमी खाली गर्न संघीय सरकारले सहयोग नगरेको आरोप लगाएका थिए। तर संघीय सरकारका उपप्रधानमन्त्री तथा गृहमन्त्री नारायणकाजी श्रेष्ठ प्रकाशले तथ्यबाट पुष्टि हुन नसक्ने काममा संघ सरकारले सहयोग नगर्ने बताएका थिए।

मंगलबार बसेको संघीय मन्त्रिपरिषद् बैठकले काठमाडौंका मेयरले अधिकार क्षेत्रबाहिर गएर टिप्पणी गरेको ठहर गरेको थियो। संघ सरकारले महानगरपालिकाका मेयर बालेन्द्र शाहलाई जिम्मेवारीबोध गर्नसमेत सचेत गराएको छ। सोही बैठकले सिंहदरवारको फोहोर नउठाएको विषयमा संघीय सरकारले काठमाडौँ महानगरका मेयर बालेन्द्र शाहसँग छलफल गर्ने समेत निर्णय गरेको थियो।

संघीय सरकारले आफ्ना काममा सहयोग नगरेको भन्दै सिंहदरबार, बालुवाटार र शीतलनिवासको फोहोर नउठाउन महानगरको सम्बन्धित विभागलाई निर्देशन दिएका छन्। उनको निर्देशनपछि सिंहदरवारमा फोहोर थुप्रिन थालेको छ।

फेरि किन ‘फायर’ भए बालेन?

‘फोहोर नउठेको विषय गम्भीर कुरा हो। यो स्थानीय तहको अधिकार क्षेत्रको कुरा भए पनि किन त्यसो गरियो भनेर यसबारे आवश्यक कुरा गर्ने निर्णय भयो,’ सरकारकी प्रवक्ता रेखा शर्माले भनेकी थिइन्, ‘काठमाडौँ उपत्यकाको फोहोर काठमाडौँ महानगरपालिकाले उठाउने नीतिगत व्यवस्था हो। यो व्यवस्था परिवर्तन भएको छैन। व्यवस्था परिवर्तन नहुँदै महानगर प्रमुखले त्यस्तो घोषणा किन गर्नुभयो? यसलाई सरकारले गम्भीर रुपमा लिएको छ।’

सोमबारको प्रतिनिधि सभा बैठकमा नेपाली कांग्रेसका महामन्त्री समेत रहेका सांसद गगन थापाले महानगरसँग वार्ता गर्न आग्रह गरेका थिए।