माओवादी ‘खिइँदै’ गएपछि प्रचण्डले भने- युद्धका सहयात्री एकताबद्ध हुनुपर्छ

काठमाडौँ- नेकपा (माओवादी केन्द्र) अध्यक्ष एवं प्रधानमन्त्री पुष्पकमल दाहाल ‘प्रचण्ड’ ले जनयुद्धमा योगदान गर्ने सम्पूर्ण परिवर्तनका पक्षधरलाई एकताबद्ध हुन अपिल गरेका छन्।

नेकपा(माओवादी केन्द्र)ले आयोजना गरेको ‘जनयुद्ध दिवस’को कार्यक्रम उद्घाटनपछि परिवर्तनका लागि बलिदान गर्ने योद्धाहरुलाई आरोपित गर्ने अधिकार कसैलाई पनि  नभएको जिकिर समेत गरे।

‘एकै मोर्चा र केन्द्रमा एकता बद्ध गर्न आग्रह गर्दछु। ढिलो नगरी आनुहोस् बसौं, समीक्षा गरौं। नयाँ लहर सिर्जना गरौँ,’ उनले भने, ‘माओवादी युद्धका सहयात्रीहरु आउनुहोस। यो मोर्चालाई एकताबद्ध गरौँ।’

सामाजिक न्याय र सुशान कायम गरेर अगाडि बढ्ने अवसर भएको बताउँदै अध्यक्ष प्रचण्डले संकल्प गर्ने यस दिनमा सबै एकताबद्ध हुन अपिल गरे।

पार्टीका वरिष्ठ उपाध्यक्ष एवं उपप्रधान तथा गृहमन्त्री नारायणकाजी श्रेष्ठले सरकारले जनयुद्ध दिवस मनाउन बिदा दिएको भए पनि अदालतको निर्णयलाई स्वीकार गर्नुपरेको बताएका थिए।

सशस्त्र द्वन्द्वमा होमिएको माओवादी विभाजन भएर थुप्रै दल बनेका छन्। बेलामौकामा प्रचण्डले एकताबद्ध हुन अपिल गर्दै आएपनि त्यसका लागि ठोस प्रयास भने गरेका छैनन्।