महासमिति हलबाट गगनलाई देउवाको ‘काउन्टर’

काठमाडौँ- नेपाली कांग्रेसका सभापति शेरबहादुर देउवाले आगामी चुनावमा गठबन्धन नगर्ने संकल्प गर्नुपर्ने महामन्त्री गगन थापाको प्रस्तावको विरोध गरेका छन्। ललितपुरको गोदाबरीमा सोमबार सुरु भएको महासमिति बैठकलाई सम्बोधन गर्दै देउवाले चुनावमा गठबन्धन गर्ने/नगर्ने विषय तत्कालीन परिस्थितिमा निर्भर रहने उल्लेख गर्दै अहिल्यै त्यस विषयमा निर्णय लिन नहुने बताएका हुन्।

‘भविष्यमा राजनीतिक गर्ने कि नगर्ने भन्ने विषयमा तत्कालीन परिस्थितिमा निर्भर हुने हुँदा पार्टीले तत्कालीन परिस्थितिअनुसार गठबन्धनको औचित्य, सान्दर्भिकता लगायतको ठोस मूल्यांकनमा त्यसैबेला निर्णय लिन सक्ने छ,’ देउवाको भनाइ छ।

यसअघि सभापति देउवाले आगामी चुनावमा गठबन्धन नगर्ने विषय महामन्त्री गगन थापाको सांगठनिक प्रतिवेदनबाट हटाउन दबाब दिएका थिए। तर गगनले भने त्यसलाई अस्वीकार गर्दै आफूले फरक मत दर्ज गर्ने बताएका थिए। कांग्रेसबाहेकका चिह्नमा भोट दिन लगाउँदा कार्यकर्ता मात्र होइन, समर्थकसमेत असन्तुष्ट रहेको उल्लेख गरेका छन्।

यद्यपि गगनको प्रतिवेदनमा केन्द्रीय समिति बैठकले पारित गरिसकेको छ।

संस्थापन पक्षका नेताहरुले आपत्ति जनाएपछि प्रतिवेदनमा सहमति जुट्न सकेको छैन। उद्घाटन समारोह सकिएपछि फेरि छलफल गर्ने भनेर गोदावरी पुगेका देउवाले उद्घाटन समारोहबाटै महामन्त्री थापालाई जवाफ दिएका छन्।

उनले अहिलेको गठबन्धन पनि संविधान रक्षाका लागि कांग्रेसकै पहलमा बनेको बताए। प्रतिनिधिसभा विघटन गर्ने, अस्थिरता ल्याउने, गणतन्त्र कमजोर बनाउने गतिविधि भएपछि कांग्रेसले पहल लिएको देउवाले भने।

‘अहिले हामी गठबन्धनको अभ्यासमा छौं। गठबन्धन सकरा १० महिना अघि मात्र बनेको हैन। प्रतिनिभिसभा विघटन गर्ने र संघीय लोकतान्त्रिक गणतन्त्रलाई कमजोर बनाउने काम भएपछि यसको रक्षाका लागि कांग्रेसको नेतृत्वमा गठबन्धन बनेको हो,’ उनले भने, ‘ वर्तमान सरकार त्यसैको निरन्तरता हो। महासमितिमा पेश भएको सबै दस्तावेजले गठबन्धनको विषयलाई समेटिएको छ। वर्तमान गठबन्धन सबैको अग्रसरतामा संविधानकमो रक्षाको उदेश्यले बनेको हो।’

सभापति देउवाले नेपाली कांंग्रेसको विधानमा समय सापेक्ष बनाउन संसोधनको आवश्यकता भएको बताए। उनले पार्टीलाई थप बलियो बनाउन विधान संसोधन आवश्यक भएको उल्लेख गरे।

उद्घाटन सत्रमा बोल्दै सभापति देउवाले संविधान गतिशितल दस्तावेज भएको र यसमाथी जनताको स्वीकार्यता र स्वामित्व आवश्यक भएको उल्लेख गरे। उनले जनताको आशा भरोसा स्थापित गर्न संविधान कार्यान्वनयमा देखिएको अस्पष्टता जटिलता पहिचान गरेर स्पष्ट पार्दै अघि बढ्नुपर्ने धारणा राखे।

कांग्रेस जनताले आशा भरोसा गरेको पार्टी भएकाले जनताको विश्वासलाई खण्डित गर्न नहुने उनको भनाइ छ। ‘अहिले पार्टी ठूलो बनेको छ। संगठन बलियो छ। जनताको आशा भरोसा कांग्रेसप्रति छ। कांग्रेसले विश्वासलाई खण्डित हुन दिनु हुँदैन,’ उनले भने।

सभापति देउवाले पार्टीको १४ औं महाधिवेशनले नेतृत्व मात्र चयन गरेको समय अभावका कारण नीतिगत विषयमा दस्तावेज राखेर छलफल गर्न नपाएकाले सोही उद्देश्यले महासमितिको बैठक बोलाइउको धारणा राखे।

‘दस्तावेज प्रस्ताव पेश हुनेछ। सबैले राम्ररी अध्ययन गरेर बचार राख्नुहुने छ,’ उनले भने। महासमितिमा पेश हुने सबै दस्तावेजले यसलाई आत्मसात गरेको समेत उनले बताए। सभापति देउवाले अगाडि भने, ‘वर्तमान गठबन्धन संविधान रक्षाको उद्देश्यले गठन भएको हुँदा यसको निरन्तरता हाम्रो राजनीतिक जिम्मेवारी पनि हुन गएको छ।’