रवि र मोहनलक्षित गगनको टिप्पणी- अख्तियारले डामेका र सहकारी ठगलाई घर पठाउनुपर्छ

काठमाडौँ- नेपाली कांग्रेसका महामन्त्री एवं प्रतिनिधि सभा सदस्य गगनकुमार थापाले अख्तियारले डामेका, आयोगले पोलेकादेखि सरकारी जग्गामा आखाँ लगाएसँगै सहकारी ठग र दोहोरो नागरिकता राख्ने सबैलाई घर पठाएर निश्पक्ष अनुसन्धान गर्न सुझाव दिएका छन्।

प्रतिनिधि सभाको सोमबारको दोस्रो बैठकको सून्य समयमा बोल्दै सांसद थापाले संसदमा जारी सत्ता र प्रतिपक्षी दलका सांसदबीचको दोहोरीले सदनको कारबाही प्रभावित भइरहेको अवस्थामा सभामुखसमक्ष यस्तो प्रस्ताव राखेका हुन्।

विगत केही दिनदेखि सत्ता र प्रतिपक्षी दलका सांसदहरुबीच विभिन्न विषयलाई लिएर एकअर्काप्रति आलोचना र विरोधसँगै सदनको कारबाही प्रभावित भइरहेको बेला उनले यही पाराले सदनमा मूल विषयले प्रवेश पाउन नसकिरहेको जिकिर गरे।

‘यही पाराले त न संसद राम्रोसँग चल्ने भयो, मूल विषय पनि छायाँमा पर्ने भयो। अब यसो गरौँ, आशनको दायाँ बस्ने होस् कि वायाँ बस्ने होस्, काखैको होस् कि पाखैको होस्, अख्तियारले डामेको, आयोगले पोलेको, र सरकारी जग्गामा आँखा लगाएको झण्डावालाको झण्डा छोपेर घर पठाइदिउँ,’ थापाले थपे, ‘अनि सहकारी ठग्नी, दुई चार थान नागरिकता राख्नेलाई पनि यहाँ राखेर होइन, घरै पठाइदिएर अनुसन्धान गर्न लगाऔँ।’