एक वर्ष पनि टिकेन कांग्रेसको ५ वर्षे गठबन्धन, सबै मन्त्रीलाई हटाउँदै प्रधानमन्त्री

काठमाडौँ- प्रधानमन्त्री पुष्पकमल दाहाल प्रचण्डले मन्त्रिपरिषद्का सबै मन्त्रीलाई हटाउने भएका छन्।

हालका सबै मन्त्रीलाई हटाएर सानो आकारको मन्त्रिपरिषद् पुनर्गठन गर्न प्रधानमन्त्रीले तयारी गरेको प्रधानमन्त्री निकट स्रोतको दाबी छ।

कांग्रेस र नेकपा एसलाई बिदा गरेर प्रचण्डले नेकपा एमाले, र रास्वपालाई भित्र्याउने भएका छन्। अब एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा) र जनता समाजवादी पार्टी (जसपा) बाट एक/एक जना मन्त्रीले शपथ लिने भएका छन्।

एमालेबाट पदम गिरी र माओवादीबाट वर्षमान पुन मन्त्री बन्ने भएका छन्। रास्वपाबाट रवि लामिछाने मन्त्री बन्ने चर्चा छ।

५ वर्ष गठबन्धन टिकाउने भन्दै गत वर्ष भागबन्डा मिलाएर कांग्रेस, माओवादी, नेकपा एस र जसपाले गठबन्धन गरी प्रतिनिधि सभा निर्वाचनमा लडेका थिए। चुनाबाट कांग्रेस पहिलो दल बन्दा माओवादी तेस्रो दल बनेको थियो।

प्रतिनिधि सभा सदस्यको निर्वाचनको नतिजा आएको केही समयमा नै चुनावी साझेदार कांग्रेसलाई जिल्याउँदै एमालेसँग मिलेर गत वर्ष पुस १० गते प्रचण्ड प्रधानमन्त्री बनेका थिए। तर त्यसको तीन महिना पनि नपुग्दै एमालेलाई धोका दिएर प्रचण्ड कांग्रेससँग गठबन्धन गर्न तयार भएका थिए।

पाँच वर्ष गठबन्धन सरकार चलाउने घोषणा गर्दै कांग्रेस प्रचण्ड क्याबिनेटमा सहभागी भएको थियो। सोहीअनुसार गत वर्ष चैत १७ गते कांग्रेसका पूर्णबहादुर खड्काले उपप्रधान तथा रक्षा, डा. प्रकाशशरण महतले अर्थ, रमेश रिजालले उद्योग वाणिज्य तथा आपूर्ति र सीता गुरुङले सहरी विकास मन्त्रीको शपथ लिएका थिए। पछि कांग्रेसले ९ मन्त्रालय लिएर प्रचण्डसँग सत्ता साझेदारी गरेको थियो।

सोही दिन माओवादी केन्द्रबाट नारायणकाजी श्रेष्ठले उपप्रधान तथा गृह र शक्ति बस्नेतले ऊर्जा, जलस्रोत तथा सिंचाइ मन्त्रीको शपथ लिएका थिए।

यस्तै एकीकृत समाजवादीका तर्फबाट वेदुराम भुसाल कृषि तथा पशुपन्छी विकास मन्त्री र प्रकाश ज्वाला भौतिक पूर्वाधार तथा यातायात मन्त्रीको शपथ लिएका थिए।

यसअघि एमालेसँगको साझेदारी हुँदा नै माओवादीबाट रेखा शर्माको सञ्चार तथा सूचना प्रविधि र सुदन किराँतीको संस्कृति, पर्यटन तथा नागरिक उड्डयन मन्त्रालयको जिम्मेवारीमा थिए। उनीहरू यो समाचार तयार पार्दासम्म सोही जिम्मेवारीमा कायमै छन्। तर उनीहरूलाई पनि हटाउने प्रधानमन्त्रीको तयारी छ।

तर फागुन २१ मा  (आज) आइपुग्दा  एमाले र रास्वपासँग प्रचण्डले नयाँ गठबन्धन बनाएपछि फेरि कांग्रेस र नेकपा एस सत्ताबाहिर पुगेका छन्।

फागुन १८ गते मात्र नेपाली कांग्रेसका सभापति शेरबहादुर देउवाले सत्तागठबन्धन दलबीच कुनै समस्या नरहेको दाबी गरेका थिए।

भरतपुर भ्रमण वर्ष, २०२४ को उद्घाटन समारोहमा सहभागी हुन चितवन पुगेका देउवाले विमानस्थलमा पत्रकारहरुसँग संक्षिप्त कुराकानी गर्दै गठबन्धनले निरन्तरता पाउने जिकिर गरेका थिए।

एक पार्टीका नेता तथा कार्यकर्ताले अर्को पार्टीप्रति टिकाटिप्पणी गर्नुलाई सामान्य रुपमा लिनुपर्ने भन्दै उनले गठबन्धनमा कुनै समस्या नभएको दाबी गरेका थिए।

फागुन १९ गते मात्र परराष्ट्रमन्त्री एवं नेपाली कांग्रेसका केन्द्रीय सदस्य एनपी साउदले यो गठबन्धन पाँच वर्षसम्म टिक्ने जिकिर गरेका थिए।

नेपाली कांग्रेस क्षेत्रीय कार्यसमिति, क्षेत्र नं ३ रूपन्देहीले भैरहवामा आयोजना गरेको अन्तरसंवाद कार्यक्रममा उनले प्रजातन्त्र रक्षाका लागि कांग्रेसहितको गठबन्धनको आवश्यकता औँल्याएका थिए।

‘जनताबाट अनुमोदित गठबन्धन भएकाले मन्त्रीको हेरफेर हुनसक्छ, उचित सहमतिका आधारमा प्रधानमन्त्रीको हेरफेर हुनसक्छ तर गठबन्धन पाँच वर्षका लागि चलाउनुपर्छ’, मन्त्री साउदले भने‚ ‘प्रजातन्त्र रक्षाका लागि, पार्टी र राष्ट्रका लागि, राष्ट्रमा स्थिरताका लागि यो आवश्यक र उपयुक्त छ।’

तर त्यसको भोलिपल्ट नै कांग्रेसलाई प्रचण्डले पाखा पारिदिएका हुन्।