फेरि गृहमन्त्री बन्दै रवि लामिछाने, मन्त्रालयको भागबन्डा टुंगियो

काठमाडौँ- राष्ट्रिय स्वतन्त्र पार्टीका सभापति रवि लामिछाने उपप्रधान तथा गृहमन्त्री बन्ने भएका छन्। बुधबार बालुवाटार बसेको बैठकले मन्त्रालयको भागबन्डा र त्यसमा पठाइने मन्त्रीहरुका विषयमा निर्णय लिएको हो।

रवि यसअघि पनि गृहमन्त्री बनेका थिए।

तर दोहोरो नागरिकता बनाएको मुद्दामा दोषी ठहर भएपछि २०७९ माघ १३ गते उनको मन्त्री पद गुमेको थियो।

उनले दोहोरो पासपोर्ट बनाएको मुद्दा पनि विचाराधीन छ।

यस्तै सहकारी ठगीमा जोडिएपछि सीआईबीले उनीमाथि अनुसन्धान गरिरहेको थियो।

अब उनीमाथि लागेका आरोपमा सीआईबीको अनुसन्धान प्रभावित हुने भएको छ।

रास्वपाले ४ वटा मन्त्रालय पाउनेछ। रास्वपाबाट उपसभापति डीपी अर्यालले मन्त्रीका रूपमा शपथ लिइसकेका छन्।

उनलाई श्रम मन्त्रालयमा पठाउने सभापति लामिछानेको तयारी छ।

यस्तै शिक्षा मन्त्रालयमा रास्वपाले सुमना श्रेष्ठलाई र खेलकुदमा विराजभक्त श्रेष्ठ जाने भएका छन्।

बुधबार बालुवाटारमा बसेको नयाँ गठबन्धनले मन्त्रालय बाँडफाँट पनि टुंग्याएको छ।

सहमतिअनुसार बुधबार नै मन्त्रिपरिषद् विस्तार हुँदैछ।

एमालेले ८ मन्त्रालय पाउँदा ५ वटा माओवादीले राख्ने भएको छ।

जसपाका लागि दुई मन्त्रालय छुट्याइएको छ।

सहमतिअनुसार नेकपा माओवादी केन्द्रबाट उपप्रधान तथा परराष्ट्रमन्त्री नारायणकाजी श्रेष्ठ हुनेछन्।

अर्थमन्त्री वर्षमान पुनलाई अर्थमन्त्री बनाउने माओवादीको निर्णय छ।

एमालेका रघुवीर महासेठ उपप्रधान तथा भौतिक पूर्वाधारमन्त्री बन्ने सहमति भएको छ।