राष्ट्रिय सभा अध्यक्षको उम्मेदवार स्थायी समितिले तय गर्छ : प्रचण्ड

काठमाडौँ- प्रधानमन्त्री एवं नेकपा(माओवादी केन्द्र)को संसदीय दलका नेता पुष्पकमल दाहाल ‘प्रचण्ड’ले राष्ट्रिय सभाको अध्यक्षका विषयमा स्थायी कमिटीको बैठकले निर्णय गर्ने बताएका छन्।

कांग्रेससँगको गठबन्धन तोडेर एमाले-रास्वपासँग गठबन्धन गरेपछि संसदीय दलको बैठकमा अध्यक्ष प्रचण्डले राष्ट्रिय सभा उपाध्यक्षका विषयमा पनि सोही बैठकले निर्णय गर्ने बताएका हुन्।

संसदीय दलको कार्यालय सिंहदरबारमा शनिबार बसेको बैठकमा प्रधानमन्त्री प्रचण्डले सरकारको समीकरण परिवर्तनका सम्बन्धमा प्रष्ट पारेको दलका मुख्य सचेतक हितराज पाण्डेले जानकारी दिए।

बैठकमा प्रतिनिधिसभाको पछिल्लो अवस्थाबारे प्रतिनिधिसभाका मुख्य सचेतक पाण्डे र राष्ट्रियसभाका प्रमुख सचेतक गोपीबहादुर अछामीले बैठकलाई जानकारी गराएका थिए।

विश्वासको मत लिने विषयमा सहयात्री दलसँग छलफल गरेर निर्णय लिइने पनि प्रचण्डले बताएका थिए।

पछिल्लो गठबन्धन बन्दा एमालेले राष्ट्रिय सभा उपाध्यक्ष पद लिने र अध्यक्ष पदमा एमाले उम्मेदवारलाई समर्थन गर्ने निर्णय सत्ता साझेदार ४ दलले गरिसकेका छन्।

राष्ट्रिय सभा अध्यक्ष पदमा माओवादी अध्यक्ष पुष्पकमल दाहालले आफ्ना भाइ नारायणप्रसाद दाहाललाई बनाउने विषयमा चर्चा सुरु भएको माओवादी नेताले बताउने गरेका छन्।

राष्ट्रपतिबाट मनोनित हुने तीन सिटमध्ये एक सिटमा दाहाल मनोनित भएका थिए। अर्को एक सिटमा कम्युनिस्ट नेता वामदेव गौतम मनोनित भएका छन् भने थप एक सिट रिक्त छ।

राष्ट्रिय सभाको अध्यक्ष चयनका लागि फागुन २९ गते निर्वाचन गर्ने तयारी छ।

राष्ट्रिय सभामा वर्तमान सत्ता गठबन्धनका पक्षमा जितका लागि आवश्यक सुविधाजनक मत छ।