राष्ट्रिय सभा अध्यक्षका लागि युवराज शर्मालाई उम्मेदवार बनाउने कांग्रेसको निर्णय

काठमाडौँ-  नेपाली कांग्रेसले राष्ट्रिय सभा अध्यक्ष पदमा युवराज शर्मालाई उम्मेदवार बनाउने भएको छ।

सभापति शेरबहादुर देउवाको निवास बूढानीलकण्ठमा आइतबार दिउँसो बसेको संसदीय दल कार्यसमिति बैठकले लुम्बिनी प्रदेशबाट राष्ट्रिय सभा सदस्य रहेका शर्मालाई उम्मेदवार बनाउने निर्णय गरेको हो।

शर्मालाई राष्ट्रिय सभाको अध्यक्ष पदका लागि उम्मेदवार बनाउने निर्णय भएको महामन्त्री गगन थापाले बताए।

७३ वर्षीय शर्मा कांग्रेस बाँकेका पूर्वसभापति हुन्।

उनी २०७८ माघमा भएको राष्ट्रिय सभा चुनावबाट राष्ट्रिय सभा सदस्य निर्वाचित भएका थिए। राष्ट्रिय सभामा कांग्रेसका १६ जना सांसद छन्।

आइतबार संघीय संसद् सचिवालयले फागुन २९ गते राष्ट्रिय सभाको अध्यक्ष पदका लागि निर्वाचन गर्ने तय गरिएको जानकारी दिएको छ।

प्रकाशित तालिकाअनुसार भोलि (सोमबार) ११ बजे देखि १ बजे सम्म उमेदवारी दर्ताको समय निर्धारण गरिएको छ।

दिउँसो साढे १ बजे उमेदवारको नामावली प्रकाशित गरिनेछ। राष्ट्रिय सभा अध्यक्ष चुनावका लागि सोमबार मनोनयन दर्ताको कार्यक्रम छ।

उता एमाले-माओवादी-रास्वपा र जसपाको सत्ता गठबन्धनले राष्ट्रिय सभा अध्यक्ष पद माओवादीले पाउने र उपाध्यक्षको पद एमालेले लिने समझदारी गरिसकेको छ।

माओवादीले राष्ट्रिय सभा अध्यक्ष पदमा अध्यक्ष पुष्पकमल दाहालका भाइ नारायणप्रसाद दाहाललाई उठाउने तयारी गरेका छन्। यद्यपि आधिकारिक रूपमा निर्णय गर्न भने बाँकी छ।