प्रदेशमा पनि सत्ता गठबन्धनको विपक्षी नै बन्ने राप्रपाको निर्णय

काठमाडौँ– राष्ट्रिय प्रजातन्त्र पार्टीले  अहिलेको सत्ता गठबन्धनको विपक्षी बन्ने निर्णय गरेको छ। ३ दिनसम्म बसेर सोमबार सकिएको केन्द्रीय कार्यसम्पादन समितिको बैठकले यस्तो निर्णय गरेको हो।

राप्रपाले वर्तमान गठबन्धनको विपक्षमा मतदान गर्ने निर्णय गरेको प्रचार विभाग प्रमुख मोहनकुमार श्रेष्ठले जानकारी दिए। ‍

‘राप्रपा वर्तमान सत्ता गठबन्धनमा सहभागी नहुने, विपक्षमा मतदान गर्ने र विपक्षमा बस्ने निर्णय गरिएको छ। प्रदेश सरकारमा पनि तत्त्काल सहभागी नहुने, समर्थन गर्नुपर्ने परिस्थिति आएमा पार्टी अध्यक्षले उपयुक्त समयमा सम्बन्धित प्रदेशको परामर्श लिएर निर्णय लिने निर्णय गरिएको छ’, पार्टीका निर्णयबारे जानकारी दिन राप्रपाले जारी गरेको विज्ञप्तिमा भनिएको छ।

२१ फागुनमा एमाले, माओवादी केन्द्र, राष्ट्रिय स्वतन्त्र पार्टी र जनता समाजवादी पार्टीले नयाँ गठबन्धन बनाएका छन्।

यसअघि गत वर्ष पुस १० गते बनेको एमाले-माओवादीसहितको गठबन्धनमा भने राप्रपाले उपप्रधानमन्त्री लिएर सरकारमा सहभागी भएको थियो। तर पछिल्लो गठबन्धनले भने राप्रपालाई प्रतिगामी दल करार गर्दै गठबन्धनमा सहभागी नगराउने निचोड निकालेको छ।

वर्तमान समीकरण अनुसार संघमा सरकार बनाउन राप्रपा आवश्यक नदेखिएपनि प्रदेशमा निर्णायक देखिएको छ।

राप्रपाले सबै प्रदेशमा पनि गठबन्धनको विपक्षमा रहने निर्णय गरेको प्रमुख श्रेष्ठले जानकारी दिए।

राप्रपाले प्रधानमन्त्री पुष्पकमल दाहाल प्रचण्डलाई ४० बुँदे माग बुझाएर पूरा गराउन दबाब दिन चैत १६ गतेमा काठमाडौंमा प्रदर्शनको कार्यक्रम राखेएको भएपनि यो बेला माध्यमिक शिक्षा परीक्षा (एसईई) परेकाले काठमाडौं केन्द्रित प्रदर्शन चैत २७ गतेका लागि सारिएको छ।

प्रतिनिधि सभामा राप्रपाका १४ जना सांसद छन्।