गृहमन्त्री रविलाई सीकेको चुनौती : कुम जोडेर बसेका गौर हत्याकाण्डका ‘दोषी’लाई कारबाही गर्नुस्

काठमाडौँ- जनमत पार्टीका संसदीय दलका नेता एवं सांसद सीके राउतले गौर नरसंहारकर्तालाई कारबाही गरेर देखाउन गृहमन्त्री रवि लामिछानेलाई चुनौती दिएका छन्।

बुधबार प्रतिनिधिसभा बैठकमा प्रधानमन्त्री पुष्पकमल दाहाल प्रचण्डले आफूलाई विश्वासको मत माग्दै पेस गरेको प्रस्तावमाथि टिप्पणी गर्दै उनले उक्त चुनौती दिएका छन्।

जनता समाजवादीका अध्यक्ष उपेन्द्र यादवप्रति लक्षित गर्दै उनले गौर घटनाको प्रतिवेदन आफूले प्रिन्ट गरेर ल्याइदिएको बताउँदै सँगै कुम जोडेर सरकारमा बसेका घटनाका ‘दोषी’लाई  कारबाही गर्न सक्नुहुन्छ भन्दै प्रश्न गरेका थिए।

‘तपाईंहरुलाई गौर नरसंहारको बारेमा थाहा छैन होला, भर्खर प्रतिवेदन प्रिन्ट गरेर ल्याइदिएको छु, त्यो नरसंहार हुँदा बलात्कार गरेर जिउँदै जलाएर, गोप्य अंगमा लाठी भाला रोपेर २७ जनाको निर्मम हत्या गरिएको थियो,’ उनले भने, ‘तिनैसँग आज तपाईंले कुम जोडेर बस्नुभएको छ, तिनलाई कारबाही गर्ने तपाईंको ल्याकत छ? छ भने त्यो पनि देखाउनुहोला भनेर अनुरोध गर्न चाहन्छु।’

सांसद राउतले राष्ट्रिय स्वतन्त्र पार्टीलाई लक्षित गर्दै उनीहरुले १७०००+२ को कुरा उठाएर सरकारमा गएकोमा शुभकामना दिँदै त्यही बेला प्रहरीको गोलीबाट मारिएको मधेसीको आँकडा नजोडेकोमा आपत्ति व्यक्त गरे।

उनले जनताद्वारा प्रत्यक्ष निर्वाचित कार्यकारी प्रधानमन्त्री हुने व्यवस्था गर्न माग गरेका छन्। उनले वर्तमान सत्ता गठबन्धनलाई समर्थन गर्न नसक्ने पनि उल्लेख गरे।