झपट पुरस्कार समितिबाट पुडासैनी, पोखरेल र शर्मा पुरस्कृत

काठमाडौँ- झपट पुरस्कार व्यवस्था समितिले तीन जना साहित्यकारलाई ‘झपट पुरस्कार’बाट पुरस्कृत गरेको छ।

समितिका अध्यक्ष अरुण राणाले कञ्चन पुडासैनी, डा हरिप्रसाद पोखरेल ‘मानसाग्नि’ र प्राडा ऋषिराम शर्मालाई पुरस्कार प्रदान गरेका हुन्।

कविता, काव्य, आख्यान, नाटक, निबन्ध र प्रबन्ध सिर्जनाका माध्यमबाट नेपाली साहित्यको श्रीवृद्धिमा विशिष्ट योगदान दिएबापत अमरप्राज्ञ पुडासैनीलाई ‘झपट पुरस्कार’बाट पुरस्कृत गरिएको हो।

यसैगरी योगशिक्षा तथा प्राकृतिक चिकित्साका क्षेत्रमा अहोरात्र समर्पित मानव स्वास्थ्यसेवाको संवर्धनमा उल्लेखनीय योगदान दिएबापत डा ‘मानसाग्नि’लाई ‘यज्ञ केशर पुरस्कार’ प्रदान गरिएको छ।

यी दुवै पुरस्कारका राशि जनही एक लाख रुपैयाँ छ।

नेपाली कथासाहित्यका अमर स्रष्टा गुरुप्रसाद मैनालीका कथाको वक्रोक्ति शीर्षकमा विद्यावारिधि गरी नेपाली समालोचनाका क्षेत्रमा विशिष्ट योगदान दिएबापत प्राडा ऋषीराम शर्मालाई ५० हजार रुपैयाँ रााशिको ‘सैनध्वज नन्दकुमारी शोध पुरस्कार’ प्रदान गरियो।

महासमालोचक प्रा.डा.वासुदेव त्रिपाठीले समारोहमा ‘झपट अभिलेख’को लोकार्पण गरे।

झपट पुरस्कारका संस्थापक यज्ञविक्रम राणाको शतवार्षिकीका अवसरमा सम्पन्न समारोहमा नइ प्रकाशनका कुलपति इन्दिरा प्रसाई, झपट पुरस्कार व्यवस्था समितिका उपाध्यक्ष तथा पुरस्कार निर्णायक समितिका संयोजक प्रा.केशव सुवेदी, कार्यक्रम संयोजक भगवती बस्नेत र सदस्यसचिव रेखा राणाले संस्थाका गतिविधि माथि प्रकाश पारेका थिए।