एमालेकी घिमिरे र कांग्रेसकी पुडासैनीले दर्ता गराए उम्मेदवारी

काठमाडौँ- राष्ट्रियसभा उपाध्यक्षमा नेकपा एमाले र कांग्रेसले उम्मेदवारी दर्ता गराएका छन्।

एमालेका तर्फबाट विमला घिमिरेले उम्मेदवारी दर्ता गराएकी छन् भने कांग्रेसकी विष्णुदेवी पुडासैनीले उम्मेदवारी दिएका हुन्। संसद भवन बानेश्वरमा पुगेर दुवै जनाले उम्मेदवारी दर्ता गराएका हुन्।

घिमिरेलाई सत्ता गठबन्धनको पनि समर्थन छ। यद्यपि, माधव नेपाल नेतृत्वको नेकपा एसले पनि उपाध्यक्ष पद आफ्नो पार्टीलाई दिनुपर्ने दाबी गरिरहेको छ। एमाले उम्मेदवारलाई समर्थन गर्ने बनाउन एसलाई पुष्कमल दाहाल र केपी शर्मा ओलीले फकाइरहेका छन्।

यसअघि सत्ता गठबन्धन फेर्ने बेला नेकपा एमाले, माओवादी केन्द्र, जसपा र रास्वपाबीच राष्ट्रिय सभा उपाध्यक्ष एमालेलाई दिने सहमति भएको थियो। तर गठबन्धनमा नेकपा एस थपिएपछि उक्त बुँदा हटाइएको थियो।

कांग्रेस उम्मेदवार ७६ वर्षीया विष्णुमाया गत माघमा बागमतीमा महिला क्लष्टरबाट राष्ट्रियसभामा निर्वाचित भएकी थिइन्।

२०३३ सालमा पद्मकन्या क्याम्पसमा नेविसंघमा आबद्ध गाउँ फर्क अभियानको क्रममा पार्टीबाट काठमाडौंको तत्कालीन भद्रबास गाविस-९ मा वडाध्यक्ष बनिन्।

त्यसपछि उनी २०४९ सालमा तत्कालीन भद्रबास गाविसको अध्यक्षमा निर्वाचित भएकी थिइन्।

राष्ट्रियसभा उपाध्यक्षको निर्वाचनमा यही २८ गते हुँदैछ।

हाल ५८ जना सांसद रहेको राष्ट्रिय सभामा माओवादी केन्द्रका १७, नेकपा एमालेका वामदेव गौतमबाहेक ९, नेकपा एसका ८ र जसपाका ४ सांसद छन्।

राष्ट्रिय सभा उपाध्यक्ष जित्नका लागि ३० जना सांसद संख्या आवश्यक पर्छ।