सरकारका प्रारम्भिक कामकारवाही सकारात्मक रहेको एमालेको निष्कर्ष

काठमडौँ- नेकपा (एमाले)ले सरकारको प्रारम्भिक कामकारबाही सकारात्मक रहेको बताएको छ। पार्टी मुख्यालय च्यासलमा आइतबार अपराह्न बसेको पार्टीको केन्द्रीय सचिवालय बैठकमा नेताहरूले सरकारको प्रारम्भिक कामकारबाही सकारात्मक रहेको निष्कर्ष निकालेका हुन्।

बैठकले जनतामा अझ विश्वास जगाउने गरी काम गर्न पनि सरकारलाई सुझाव दिइएको पार्टीका उपमहासचिव प्रदीप ज्ञवालीले जानकारी दिए। उनले अहिलेको निराशालाई चिर्दै देशलाई बनाउन सकिन्छ भन्ने विश्वास जगाउने गरी सरकारलाई अगाडि बढाउने कुरामा एमाले केन्द्रित रहेको बताए।

‘हामीले संक्षेपमा पछिल्लो राजनीतिक परिस्थितिबारेमा पनि चर्चा गरेका छौँ। गएको फागुन २१ गते नयाँ सत्ता समीकरण प्रारम्भ भएको छ। समग्रमा यो सकारात्मक छ। यसले देश जसरी बहुआयामिक समस्यामा फस्दै गएको थियो। त्यहाँबाट सही दिशातिर ल्याउन सफल भएको छ,’ उपमहासचिव ज्ञवालीले भने।

सरकारको कामलाई प्रभावकारी बनाउँदै हामीले हाम्रो राष्ट्रिय स्वाधीनताको रक्षा गर्ने, लोकतन्त्रलाई जनताको जीवनसँग जोडने, भ्रष्टाचारविरुद्धको अभियानलाई अझ प्रभावकारी ढङ्गले अगाडि बढाउन आवश्यक रहेको उनले बताए।

‘अहिलेको निराशालाई चिर्दै देश बनाउन सकिन्छ भन्ने विश्वास जगाउने गरी सरकारलाई अगाडि बढाउने कुरामा हामी केन्द्रित छौँ। बैठकमा हामीले त्यही विषयमा छलफल गरेको छौँ’ उनले भने ‘सरकारका प्रारम्भिक गतिविधिहरू, अहिले सुरु गरेको स्पिरिटहरु सकारात्मक छन्। अझ बढी सरकारले जनतालाई विश्वास जगाउने गरी काममा गति ल्याओस् भन्ने अपेक्षा छ।’

वैशाख ८ र ९ गते गोदावरीको सनराइज हलमा आयोजना हुने पार्टी महाविधेशन प्रतिनिधि परिषद् बैठकमा अध्यक्ष केपी शर्मा ओलीले प्रस्तुत गर्नुहुने राजनीतिक प्रतिवेदन, महासचिव शङ्कर पोखरेलले प्रस्तुत गर्नुहुने कामको समीक्षासम्बन्धी प्रतिवेदनमाथि छलफल हुने उनले जानकारी दिए। परिषद् बैठकमा करिब २५ सय प्रतिनिधिहरू सहभागी हुने एमालेले जनाएको छ ।