प्रचण्ड र झलनाथबीच के भयो कुराकानी?

काठमाडौँ- नेकपा एकीकृत समाजवादीका नेता झलनाथ खनालले र प्रधानमन्त्री पुष्पकमल दाहाल प्रचण्डबीचको कुराकानी सत्ता गठबन्धनलाई टिकाइरहने र सुदूरपश्चिम प्रदेश सरकार गठनका विषयमा छलफल भएको छ।

मंगलबार बिहान प्रचण्ड भेट्न बालुवाटार पुगेका नेता खनाल र प्रचण्डबीच सत्ता गठबन्धन पनि टिकाउने र सुदूरपश्चिम प्रदेशमा नाउपा अध्यक्ष रञ्जिता श्रेष्ठले भनेका कैलाश चौधरीलाई नै मुख्यमन्त्री बनाउने विकल्पहरूका विषयमा छलफल भएको हो।

सत्ता गठबन्धन टिकाउने हो भने पहिलो चरणमा नै सुदूरपश्चिम प्रदेशको मुख्यमन्त्री आफ्नो दललाई दिनुपर्ने प्रस्ताव झलनाथले प्रचण्डसँग राखेका थिए। यसअघि नै सुदूरपश्चिमको मुख्यमन्त्रीमा रञ्जिता पक्षका कैलाशले मुख्यमन्त्रीमा दाबी गरिसकेकाले उनलाई समर्थन गर्ने वातावरण नेकपा एसमा बनाउन प्रचण्डले झलनाथलाई प्रस्ताव गरेका थिए।

यसअघि नै नेकपा एसले कांग्रेससहितको समर्थनमा नाउपामा रेशम चौधरी पक्षका लक्ष्मणकिशोर चौधरीलाई मुख्यमन्त्री बनाउन समर्थन गर्ने निर्णय गरिसकेको छ। नाउपाकै दुई जनाले मुख्यमन्त्रीमा दाबी गरेपछि प्रदेश प्रमुखले दुवै पक्षको दाबी बुझेर मुख्यमन्त्री नियुक्ति प्रक्रियालाई तामेलीमा राखेका छन्। उनले मुख्यमन्त्री बनाउने प्रक्रिया अघि बढाउन प्रधानमन्त्री पुष्पकमल दाहाल ‘प्रचण्ड’ र केपी शर्मा ओलीको निर्देशन पर्खेर बसेका छन्।

झलनाथको कुरा सुनेका प्रचण्डले भने यो विषयमा मिलाउन सकिने भन्दै मंगलबार साँझसम्मको भाका दिएका छन्।

रेशम पक्षका लक्ष्मणकिशोरले नाउपाका ७ जना, कांग्रेसका १८ जना र एकीकृत समाजवादीका ४ जना गरेर २९ जना प्रदेश सभा सदस्यले आफूलाई समर्थन गरेको भन्दै आफूलाई मुख्यमन्त्रीमा नियुक्त गर्न आइतबार प्रदेशप्रमुख मियाँलाई दाबी पेस गरेका छन्।

रेशमकै श्रीमती रञ्जिता पक्षका कैलाश चौधरीले पनि नाउपाका ७, एमालेका १०, माओवादी केन्द्रका १० र स्वतन्त्र सांसद डा.ताराप्रसाद जोशी गरी २८ जनाको समर्थन आफूलाई भएको भन्दै आइतबार नै मुख्यमन्त्रीमा दाबी पेश गरेका छन्।