गृहमन्त्रीको कुरालाई प्रधानमन्त्रीले भने- बेतुकको कुतर्क

चितवन– प्रधानमन्त्री पुष्पकमल दाहालले सहकारी ठगीका आरोपित जीबी राईलाई अघिल्लाे सरकारले भगायाे भन्ने आफ्नै गृहमन्त्रीको कुरा बेतुककाे कुरा भएकाे बताएका छन्।

आइतबार दिउँसाे भरतपुर विमानस्थलमा पत्रकारसँग कुरा गर्दै दाहालले भने, ‘कुतर्क कसैले पनि नगराैं। अघिल्लाे सरकारले, प्रधानमन्त्रीले र अघिल्लाे गृहमन्त्रीले भगाएकाे भन्नू बेतुककाे तर्क हाे ।’

जीबी राईलाई ल्याउनु पर्दछ भन्नेमा सरकार प्रष्ट भएको बताएका उनले भने, ‘पासपाेर्टकाे ईस्युले गर्दा समस्या भएकाे हाे। त्यसलाई हल गर्न खाेजिदैछ।’

यसअघि शनिबार मात्रै चितवन पुगेका उपप्रधान एवम् गृहमन्त्री रवि लामिछानेले भरतपुर विमानस्थलमै पत्रकारहरुसँग कुरा गर्दै जीबी राईलाई अघिल्लाे सरकारले भगाएकाे आराेप लगाएका थिए।

उनले नेपाली कांग्रेसले सहकारी प्रकरणमा गृहमन्त्री लामिछानेमाथि छानबिन गर्न संसदीय समिति बनाउनु पर्ने माग गर्दै संसद् अवरूद्ध पारेको भन्दै समस्याग्रस्त सहकारीबारे अध्ययन गर्न समिति बनाउने विषयमा सरकार सकारात्मक रहेको बताए। उनले त्यसमा कांग्रेस पनि सहमत हुने आशा व्यक्त गरे।

‘हामी भाेलि या पर्सि बिहानसम्म कांग्रेससँग सहमति गर्छाैं। सहमति नहुँदैमा संसदमा राष्ट्रपतिले नीति तथा कार्यक्रम पेस नगर्ने भन्ने हुँदैन। राष्ट्रपतिले सम्बाेधन गर्ने कुरालाई कुनै अवराेध कसैले पनि गर्नु हुँदैन,’ उनले भने।