इथियोपिया र ब्राजिलमा निलेको किलोका किलो कोकिन काठमाडौँमा निस्कियो

काठमाडौँ- लागु औषध नियन्त्रण ब्यूरोले साढे ४ केजी कोकिनसहित ४ जना विदेशी नागरिकहरुलाई पक्राउ गरेको छ।

पक्राउ पर्नेमा तान्जानिया घर भएका ६८ वर्षीय डोनाल्ड ज्याक्सन माबुगा, बोलिभिया घर भएकी ३३ वर्षीया लाउरा क्रुज टिकोना, भेनेजुयलाका ३९ वर्षीय सिमोन एन्टोनियो अल्फोन्जो राडा र भारतीय नागरिक २७ वर्षीया लालरु उत्सङ्गी छन्।

आरोपीहरूको साथबाट ४ किलो ५०४ ग्राम कोकिन बरामद गरिएको लागु औषध नियन्त्रण ब्युरोका एसएसपी दिनेश आचार्यले जानकारी दिए। उक्त कोकिनको बजार मूल्य १५ करोड ७६ लाख हुन आउने उनको भनाइ छ।

६८ वर्षीय डोनाल्डले इथियोपियाको अदिश अबाबाबाट १८ वटा प्लास्टिक कोटेड क्याप्सुल निलेर काठमाडौँ आएका हुन्। उनको पेटबाट प्रहरीले १ केजी २०६ ग्राम क्याप्सुल निकालेको छ।

डोनाल्डको अहिले प्रहरी अस्पतालमा उपचार भइरहेको छ।

बोलिभियन लाउर क्रुजले १२१ वटा कपडाको बटनमा लुकाएर २ किलो १ सय ग्राम कोकिन ल्याएकी हुन्।

भेनेजुयलाका ३९ सिमोन पनि क्याप्सुल आकारका कोकिन निलेर ब्राजिलबाट काठमाडौँ आएका थिए। उनको साथबाट १ किलो १९८ ग्राम बरामद गरिएको छ।

कोकिन खरिद गर्न आएको अवस्थामा भारतीय युवती पक्राउ परेकी हुन्।