काठमाडौँमा बाढी, नागार्जुनमा एक जनाको मृत्यु

काठमाडौँ– अविरल वर्षाका कारण काठमाडौँका खोलानदी किनारमा बाढी आएको छ।

बागमती करिडोरका युएन पार्क र बल्खु क्षेत्रका बस्तीमा बाढी पसेको हो।

वर्षाका कारण काठमाडौंको सबैजसो नदीको जलसतह बढेको छ।

भक्तपुरमा नदी तथा खोला किनारका बस्तीका घर डुबानमा परेका छन्।

मध्यपुर थिमी नगरपालिका-२ दिव्येश्वरी प्लानिङ नजिक १८ वटा टहरा मनोहरा खोलाले डुबाएको छ।

विभिन्न जिल्लाबाट आई ज्याला मजदुरी गरी बसेका ५६ जना बस्ने टहरा खोलाले डुबाएको छ।

मध्यपुर थिमी नगरपालिका-३ कौशलटार नजिक हनुमन्ते खोलामा आएको बाढीले आश्विन आचार्यको जस्ताको टहरा डुबाएको छ।

वर्षापछिको पहिरोले काठमाडौंको तारकेश्वर नगरपालिका जितपुर फेदी र दक्षिणकाली नगरपालिका छैमलेमा एक एक वटा घर भत्किएको छ।

काठमाडौं महानगरपालिका घट्टेकुलोमा भित्रीसडक पनि भासिएको प्रहरीले जानकारी दिएको छ।

मनोहरा खोलामा आएको बाढीले ललितपुरको च्यासलस्थित सडक डुबानमा परेको छ।

नेकपा एमाले पार्टी केन्द्रीय कार्यालयसँगैको सडक मनोहरामा बाढी आएसँगै डुबानमा परेको हो।

पानीको बहाब बढेकाले उक्त सडकमा सवारी आवागमन बन्द छ। सडक जलमग्न भएको छ।

उपत्यकाका खोला किनार अहिलेसम्म खतरामुक्त देखिएको तर पानी आइरहेकाले प्रहरीले खोला किनारमा गस्ती गरिरहेको छ।

पहिरोका कारण काठमाडौंको नागार्जुन नगरपालिका-३ सिंगल ट्री नजिकै एक जनाको मृत्यु भएको छ।

शनिबार बिहान सवा ट्रपिकल रेस्टुरेन्टको भान्साकोठा पहिरोले पुरिँदा एक जना युवाको मृत्यु भएको हो।

गोरखाको सहिद लखन गाउँपालिका-६ का २२ वर्षीय मनोज विकको मृत्यु भएको हो।

काठमाडौं उपत्यका प्रहरी कार्यालयका प्रवक्ता प्रहरी वरिष्ठ उपरीक्षक दिनेशराज मैनालीका अनुसार विक किचन हेल्पर हुन्।

उनको उपचारका क्रममा स्वयम्भुस्थित मनमोहन मेमोरियल अस्पतालमा मृत्यु भएको हो।