पहिरोले दुई बस बगाउँदा ६० यात्रु बेपत्ता

काठमाडौँ- नारायणगढ मुग्लिङ सडक खण्ड अन्तर्गतको सिमतालमा पहिरोले दुई वटा यात्रुबाहक बस बगाउँदा ६० जना बेपत्ता भएका छन्।

प्रधानमन्त्री पुष्पकमल दाहाल ‘प्रचण्ड’ले पहिरोले दुई बस बगाउँदा ५ दर्जन यात्रु बेपत्ता भएको फेसबुकमा लेखेका छन्।

लेदोसहितको पहिरोका कारण बसलाई बगाएर त्रिशूलीमा मिसाएको इलाका प्रहरी कार्यालय मुग्लिङकी प्रहरी निरीक्षक निरला भण्डारीले जानकारी दिइन्। उनका अनुसार बेपत्ता यात्रुको संख्या ६० भन्दा बढी हुन सक्ने सम्भावना छ।

वीरगञ्जबाट काठमाडौँतर्फ जाँदै गरेको बागमती प्रदेशको १५१६ नम्बरको एन्जल डिलक्स लेखेको यात्रुबाहक बस र काठमाडौँबाट गौरतर्फ जाँदै गरेको नम्बर नखुलेको गणपति डिलक्स लेखेको बस पहिरोले बगाएको हो। दुवै बसमा सवार यात्रु जनाको अवस्था अज्ञात छ।

गणपति डिलक्सबाट ३ यात्रुले हामफालेर ज्यान जोगाएका छन्। चितवनका प्रमुख जिल्ला अधिकारीका इन्द्रदेव यादवका अनुसार एन्जलमा २४ जना र गणपतिमा ४१ जना यात्रु रहेका थिए। दुवै बसमा सवार बाँकी यात्रुको अवस्था अज्ञात छ।

त्रिशूली नदीले बसलाई बगाएर घटनास्थलभन्दा केही तल पाखा लगाएको तर तत्कालै त्यहाँसम्म पुग्न सक्ने नरहेको यादवको भनाइ छ।

सोही सडकको कालीखोलाको पहिरोका कारण गोताखोरहरू आउन नसकेका कारण उद्धार ढिलाइ भएको थियो।

नारायणगढबाट १७ किलोमिटर उत्तर पश्चिममा पर्ने उक्त स्थानमा बिहान ३ः३० बजेको समयमा सडकको माथिल्लो भागबाट लेदोसहितको पहिरोले बस बगाएर त्रिशूलीमा पुर्‍याएको थियो।

सोही सडक खण्डमा पहिरोबाट आएको ढुंगाले लागेर एक बसका चालकको निधन भएको छ।

बुटवलबाट काठमाडौं जाँदै गरेको लु २ ख ६५६६ नम्बरको बसलाई ढुंगाले लाग्दा गम्भीर घाइते भएका चालक नवलपरासीका मेघनाथ विकको उपचारका क्रममा चितवन मेडिकल कलेजको शिक्षण अस्पतालमा निधन भएको एसपी भावेश रिजालले बताए ।

नारायणगढ–मुग्लिन सडकको सिमलतालमा पहिरोले दुई वटा यात्रुबहाक बस बगाएको घटनाप्रति प्रधानमन्त्री पुष्पकमल दाहाल ‘प्रचण्ड’ले दुःख व्यक्त गरेका छन्।

‘नारायणगढ-मुग्लिन सडकखण्डको सिमतालमा पहिरोले बस बगाउँदा झण्डै पाँच दर्जन यात्रु बेपत्ता एवं देशका विभिन्न भागमा बाढी पहिरोका कारण भएको धनजनको क्षतिप्रति गहिरो दुख व्यक्त गर्दछु,’ प्रचण्डले फेसबुकमा लेखेका छन्, ‘बेपत्ता यात्रुहरूको खोजी एवं प्रभावकारी उद्धारका लागि गृह प्रशासन लगायत सरकारका सबै निकायलाई निर्देशित गर्दछु।’