क्रिकेट खेलाडीलाई सरकारले ६ लाख पुरस्कार दिने

काठमाडौँ- एसीसी प्रिमियर कप क्रिकेटमा जित निकाल्ने नेपाली क्रिकेट खेलाडी र अफिसयललाई सरकारले पुरस्कार दिने भएको छ। मंगलबार सम्पन्न फाइनल खेलमा युएईलाई ७ विकेटले हराउँदै विजेता भएको नेपाली टिमका खेलाडीलाई सरकारले जनही ६ लाख र अफिसियललाई जनही ३ लाख रुपैयाँ नगद पुरस्कार दिने भएको हो।

नेपालमै आयोजना भएको प्रिमयर कपको फाइनलमा नेपालले ११८ रनको लक्ष्य तीन विकेट मात्र गुमाएर पुरा गरेको थियो। यससँगै नेपाल फेरी एसिया कपमा छनोट भएको छ। एसिया कपमा नेपाल भारत पाकिस्तान रहेको टिममा सम्म पुगेको छ।

नेपालको खेलकुद पुरस्कार कार्यविधि अनुसार एसीसी प्रिमियर कप क्रिकेट विजेता खेलाडीलाई जनही ५ लाख रुपैयाँ पुरस्कार दिने प्रावधान रहेको छ। बुधबार बसेको मन्त्रिपरिषद् बैठकले कार्यविधिमा भएको रकममा एक लाख बढाएर पुरस्कार घोषणा गरेको हो।

चालु आर्थिक वर्षको बजेटमा त्रिवि मैदनमा फ्लड लाइट जडानको काम सक्ने व्यवस्था रहेको छ। यसको लागि प्रक्रिया अघि बढिसकेको छ। तर नेपालमा ‘फ्लुड-लाइट’ जडानको लागि प्राविधिक नभएपछि विदेशबाट मगाउनु परेको सरोकारवाला निकायले बताउँदै आएको छ।

नेपालले यसअघि लिग दुईको प्रतियोगिता अन्तर्गत घरेलु मैदानमा भएका दुई सिरिजमा लगातार जित निकालेको थियो। ती जितपछि नेपाल एकदिवसीय विश्वकप छनोटको ग्लोबल क्वालिफायरमा पुगेको थियो।