गृहमन्त्री लेखकको पहिलो निर्णय : सिमलताल दुर्घटनाबारे अध्ययन कार्यदल गठन

काठमाडौँ- नवनियुक्त गृहमन्त्री रमेश लेखकले सिमलताल पहिरोले सोहोरेर दुई वटा बस त्रिशूली नदीमा बगाएको घटनाबारे अध्ययन गर्न कार्यदल गठन गरेका छन्।

सोमबार शपथ लिएर मन्त्रालयमा कार्यभार सम्हाल्दै लेखकले सहसचिव छवि रिजालको नेतृत्वमा कार्यदल बनाउने निर्णय गरेका हुन्।

कार्यदलमा तीन वटा सुरक्षा निकायका तीन जना, भौतिक मन्त्रालयका एक जना सदस्य रहनेछन्।

अध्ययन प्रतिवेदन तयार गर्न कार्यदलले १० दिनको समय पाएको छ।

नारायणगढ–मुग्लिन सडकखण्ड अन्तर्गत सिमलतालमा गत शुक्रबार बिहान करिब साढे ३ बजे खसेको पहिरोले दुई वटा बसलाई सोहोरेर त्रिशूली नदीमा खसालेको थियो।

दुई बसमा ६५ जना यात्री रहेको जिल्ला प्रशासन कार्यालयले अनुमान गरेको छ। तीमध्ये तीन जनाले पौडिएर ज्यान बचाएका थिए।

बाँकी रहेका ६२ जनामध्ये ११ जनाको मात्र शव भेटिएको छ। बाँकी यात्रु र बस भेटिएका छैनन्।

पदबहालीपछि संक्षिप्त सम्बाेधन गर्दै उनले निष्ठापूर्वक काम गर्ने प्रतिबद्धता व्यक्त गरेका थिए।

‘यो मन्त्रालय देशमा विधिको शासन स्थापना, शान्ति व्यवस्था र अपराध नियन्त्रण गर्ने कुरामा केन्द्रित रहनेछ,’ उनले भने, ‘यहाँ बस्दासम्म यो मन्त्रालयले गर्नुपर्ने काम निष्ठापूर्वक गर्नेछु भन्ने प्रतिबद्धता व्यक्त गर्न चाहन्छु।’

तत्कालका लागि प्राकृतिक प्रकोपसम्बन्धी समस्या सम्बोधनलाई प्राथमिकतामा राखेर काम गरिने उनले जानकारी दिए। उनले भने, ‘यो मन्त्रालयमा तत्काल गर्नुपर्ने काम भनेको प्राकृतिक प्रकोपबाट जुन जनधनको क्षति भएको छ, त्यसलाई उचित ढंगले सम्बोधन गर्ने कुरा अहिले सबैभन्दा प्राथमिकताको र सबैभन्दा उच्चतम महत्त्व दिएर काम गर्नुपर्ने क्षेत्र हो। जुन विषय परिस्थिति सिर्जना गरेको छ त्यसलाई सम्बोधन गर्ने हाम्रो पहिलो दायित्व हो।’

पदबहालीको क्रममा यहीसम्बन्धी निर्णय भएको पनि उनले जानकारी दिए। राजनीतिक स्थिरता, भ्रष्टाचार नियन्त्रण, अर्थतन्त्रमा सुधार र संविधानको समीक्षा सरकारको प्रमुख प्राथमिकता रहेको मन्त्री लेखकको भनाइ छ।