नक्कली शरणार्थी प्रकरण : सन्दीप रायमाझीलाई ३ दिन थुनामा राख्न अनुमति

काठमाडौँ– नेकपा (एमाले)का सचिव एवम् पूर्वमन्त्री टोपबहादुर रायमाझीका छोरा सन्दीप रायमाझीलाई तीन दिन हिरासतमा राख्न अदालतले अनुमति दिएको छ। बिहीबार काठमाडौँ जिल्ला अदालतमा उपस्थित गराइएका रायमाझीलाई तीन दिन हिरासतमा राखेर अनुसन्धान गर्न प्रहरीले अनुमति पाएको हो।

नेपाली नागरिकलाई नक्कली भुटानी शरणार्थी बनाई अमेरिका पठाउने प्रलोभन देखाई मोटो रकम असुली गरेको आरोपमा सन्दीपसहित ८ जना पक्राउ परेका छन्। यो प्रकरणमा तत्कालीन ऊर्जामन्त्री सन्दीपका बुबा टोपबहादुर रायमाझीसमेत मुछिएका छन्।

पक्राउ पर्नेमा उपराष्ट्रपति कार्यालयमा कार्यरत सचिव टेकनारायण पाण्डे,तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, सन्देश शर्मा (दाङ), केशव दुलाल (मोरङ), सागर राई (मोरङ), सानु भण्डारी (ललितपुर) र कुमार गुरुङ (पाँचथर) पक्राउ परिसकेका छन्। दुलालले सुजाता कोइराला परराष्ट्रमन्त्री भएका बेला निजी सचिवालयमा काम गरेको खुलेको छ।

भूटानी शरणार्थीको प्रमाणीकरणका लागि सरकारले २०७६ वैशाखमा बालकृष्ण पन्थीको संयोजकत्वमा कार्यदल गठन गरेको थियो। हालसम्म सार्वजनिक नगरिएको प्रतिवेदनको अनुसूचीमा नाम थपेर अमेरिका पठाइदिने भन्दै राईसमेतको संलग्नता भएको गिरोहले झापा, मोरङ, सुनसरी, कास्की, बाग्लुङलगायतका जिल्लाका मानिसहरुबाट रकम असुली गरेको आरोप लागेको छ।

यही गिरोहमा संलग्न भएको आरोपमा इन्द्रजितका छोरा निरज राईविरुद्ध पनि प्रहरीले पक्राउ पुर्जी जारी गरेको छ। यस्तै पूर्वगृहमन्त्री रामबहादुर थापा बादलका छोरा प्रतीक थापाविरुद्ध पनि पक्राउ पुर्जी जारी भएको छ।

थप समाचार

नक्कली शरणार्थी बनाएर पैसा असुल्ने धन्दामा बाबु पक्राउ, छोरा खोज्दै प्रहरी

बादलका छोरा प्रतीक भन्छन्- नक्कली शरणार्थी प्रकरणमा मेरो संलग्नता छैन

गगनले भने–भुटानी शरणार्थी प्रकरणमा संलग्न कोही नछुटुन्

सचिव टेकनारायण पाण्डे प्रहरी नियन्त्रणमा