बंगलादेशमा अन्तरिम सरकार बनाउने सेनाको घोषणा

ढाका- प्रधानमन्त्री शेख हसिनाले राजीनामा दिएर शरण लिन भारत पसेपछि अन्तरिम सरकार बन्ने सेनाले घोषणा गरेको छ।

प्रधानमन्त्री हसिनाले देश छोडेपछि सेनाका प्रमुख जनरल वकार–उज–जमानले सञ्चारमाध्यमलाई सम्बोधन गर्दै बंगलादेशमा अन्तरिम सरकार बन्ने घोषणा गरेका हुन्।

बीबीसी बाङ्लाका अनुसार सेनाप्रमुख वकार उज जमानले राजनीतिक दलका नेताहरूसँग छलफल गरेपछि उनले यस्तो बताएका हुन्।

यद्यपि कसको नेतृत्वमा अन्तरिम सरकार बनाउने भन्ने विषयमा सेनाप्रमुख जमानले कुनै पनि विषय खुलाएका छैनन्।

‘अन्तरिम सरकार बनाउने निर्णय गरेका छौं। अब अन्तरिम सरकार गठनबारे छलफल गर्न राष्ट्रपतिसमक्ष जानेछौँ। हामीलाई विश्वास गर्नुहोस्,’ दलका नेताहरूसँग छलफल गरेपछि सेनाप्रमुख जमानले भने, हामीले सबै राजनीतिक दलका नेताहरूसँग कुरा गरेका छौं, सबैलाई यहाँ बोलाएका थियौं। त्यसैले छलफल भयो।’

उनले प्रधानमन्त्री शेख हसिनाले राजीनामा दिएको पनि पुष्टि गरे।

सोमबार रातिसम्ममा नयाँ सरकार बनाउने विषयमा निर्णय हुन सक्ने उनको भनाइ छ।

सेनाप्रमुख जमालले आन्दोलनकारीलाई घर फर्कनसमेत आग्रह गरेका छन्। सेना र प्रहरीलाई गोलाबारी नगर्न निर्देशन दिइएको उनको जिकिर छ।

‘कृपया मलाई मद्दत गर्नुहोस्। हामी अब झगडा गर्ने छैनौं। त्यसैले कृपया हामी सबै विनाशबाट बच्न दिनुहोस्। हरेक अन्यायको न्याय हुनेछ,’ उनले आन्दोलनकारीहरूसँग आग्रह गरे।

छलफलमा जमात अमिर, नेकपाका शीर्ष नेता, राष्ट्रिय पार्टीका नेता, नागरिक समाजका व्यक्तिहरु सहभागी थिए। तर अवामी लिगबाट कोही पनि सहभागी नभएको बताइएको छ।

यतिबेला ढाकाका सडकमा सेना तैनाथ गरिएको छ। तर पनि र्‍यालीलाई रोक्न सकेको छैन। दिउँसोदेखि नै सडकमा प्रहरीको उपस्थिति भने न्यून देखिएको छ।

हजारौं मानिस पैदल र रिक्सामा प्रधानमन्त्री निवास शाहबागतर्फ लागेका थिए। र्‍यालीमा महिलाहरुको बाक्लो संख्या रहेको छ।

प्रधानमन्त्री निवासमा आन्दोलनकारी प्रवेश गरेपछि प्रधानमन्त्री शेख हसिनाले राजीनामा दिएर देश छाडेकी थिइन्। देश छोड्दा उनकी बहिनी शेख रेहाना पनि साथमा थिइन्।

बीबीसी बंगलाका अनुसार शेख हसिना हेलिकोप्टरमा भारतीय सहर अगरतला प्रस्थान गरेकी हुन्।

बंगलादेशमा आरक्षणलाई लिएर चलिरहेको आन्दोलन सोमबार थप व्यापक भएको छ।

विद्यार्थी नेताहरुले दिएको ‘लङ मार्च टु ढाका’ को आह्वानमा हजारौं मानिस ढाकाको उपनगरीय इलाकातर्फ र्‍याली गरिरहेका छन्।

आइतबारको आन्दोलनमा कम्तीमा ९० जना प्रदर्शनकारीको मृत्यु भएको बताइएको छ। कोटाविरोधी आन्दोलन सुरु भएयता ३ सय जनाको मृत्यु भएको बताइएको छ।

बंगलादेशको प्रधानमन्त्री निवासमा आन्दोलनकारी, सैनिक हेलिकोप्टर चढेर भागिन् हसिना