होटल एटिक इन सञ्चालनमा

काठमाडौँ- होटल बुकिङ र व्यवस्थापनसम्बन्धी काम गर्दै आएको ट्राभियालिटी नेपालले काठमाडौँमा आफ्नै होटल सञ्चालनमा ल्याएको छ।  काठमाडौँको सिनामंगलमा ‘एटिक होटल इन’ नाममा कम्पनीले होटल सञ्चालनमा ल्याएको हो।

गैरआवासीय नेपालीले होटल व्यवस्थानसम्बन्धी तालिम दिन र डिजिटल प्रचारको काम गर्न ट्राभियलिटीले सञ्चालनमा ल्याएका थिए। सोही कामलाई विस्तार गर्दै कम्पनीले आफ्नै होटल सञ्चालनमा ल्याएको कम्पनीका स्टाट्रेजी अफिसर सोमनाथ सापकोटाले जानकारी दिए।

मंगलबार औपचारिक कार्यक्रम गर्दै एटिक होटल इनको शुभारम्भ गरिएको हो। नेपाल पर्यटन बोर्डका उपाध्यक्ष रामप्रसाद सापकोटा (कमल) र होटल सङ्घ नेपाल (हान)का अध्यक्ष विनायक शाहले संयुक्त रुपमा एट्टिक होटल इनको शुभारम्भ गरेका थिए।

उक्त अवसरमा पर्यटन विभागका महानिर्देशक डा. नारायणप्रसाद रेग्मीले पर्यटन क्षेत्रको प्रवर्द्धनमा विभागले निजी क्षेत्रसँगको साझेदारिता र सहयोग अभिवृद्धि गर्ने विश्वास व्यक्त गरे। उनले बढीभन्दा बढी विदेशी पर्यटक आकर्षण गरेर पर्यटकीय पूर्वाधारको प्रभावकारी सदुपयोग गरिनुपर्नेमा जोड दि।

बोर्डका उपाध्यक्ष सापकोटाले होटल पूर्वाधारमा भित्रिएका ब्राण्डले नेपालको पर्यटन प्रवर्द्धनमा टेवा पुग्ने विश्वास व्यक्त गरे। हानका अध्यक्ष शाहले नेपालमा धमाधम तारे होटल तथा चेन होटल थपिरहेको भन्दै ३५ लाख पर्यटक धान्ने हालको होटल पूर्वाधारको उपयोग हुनुपर्ने धारणा राखेका थिए।

होटल सञ्चालन गर्ने कम्पनी ट्राभियलिटीका स्टाट्रेजी अफिसर सापकोटाले पछिल्ला दिनमा अन्तर्राष्ट्रिय होटल ब्रान्ड भित्रिरहेका र यसले नेपालको पर्यटन प्रवर्द्धनमा टेवा पुग्ने विश्वास व्यक्त गरे।

नेपालको पर्यटन क्षेत्रको सुधारसँगै होटलका सेवा सुविधा सुधार गरी विद्यमान ३० देखि ४० प्रतिशतको हाराहारीमा रहेको ‘अकुपेन्सी’ दरलाई सुधार गर्ने उद्देश्यले ट्राभियालिटी सञ्चालनमा ल्याइएको हो।

ट्राभियलिटीले  फ्रेन्चाइज मोडलमा होटलहरूको ‘रिजर्भेसन सिस्टम’ सञ्चालन गर्दै आएको छ। यसले सबै प्रकारका होटलको व्यवस्थापन, प्रवर्द्धन र बजार व्यवस्थापन, गुणस्तर अभिवृद्धिका लागि तालिमसमेत प्रदान गर्दै आएको सापकोटाले जानकारी दिए।

कम्पनीले होटल राइनोको व्यवस्थापनमा अमेरिकी ब्राण्ड बेस्ट वेस्टर्न प्लस भित्र्याएको छ। यो होटल आगामी अक्टोबरबाट सञ्चालनमा आउने छ।

ट्राभियालिटीले हाल नेपालका ३ दजन भन्दा बढी होटललाई सेवा प्रदान गर्दै आइरहेको छ। आगामी एक वर्षमा एक हजारभन्दा बढी होटललाई जोडने लक्ष्य कम्पनीले राखेको छ।