रविका ‘साझेदार’ छविलाई पोखरा लगियो, रास्वपा कार्यालयमा भिड

काठमाडौँ- सहकारी संस्थाको बचत अपचलनको आरोपमा पक्राउ परेका नेपाल प्रहरीका पूर्वडीआइजी छविलाल जोशीलाई पोखरा लगिएको छ।

काठमाडौँमा पक्राउ परेका उनलाई जहाजमार्फत् पोखरा लगिएको हो।

साझेदार पक्राउ परेपछि रवि लामिछानेले आकस्मिक रूपमा कार्यकर्तालाई पार्टी कार्यालयमा बोलाएका छन्।

जम्मा भएका कार्यकर्ताले केही पत्रकारहरूविरुद्ध नाराबाजी गर्दै ठेलमठेल गरेका थिए।

केही समयमा रविले पत्रकार सम्मेलन आयोजना गर्ने तयारी गरेको पार्टीका सांसद विराजभक्त श्रेष्ठले जानकारी दिए।

अहिले रास्वपा कार्यालयमा रास्वपाका नेता, कार्यकर्ता र पत्रकारहरूको भिड छ।

जोशी गोर्खा मिडिया नेटवर्कका पूर्वसञ्चालक हुन्। गितेन्द्रबाबु (जीबी) राई र पूर्वगृहमन्त्रीसमेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेसँगको साझेदारीमा जोशीले गोर्खा मिडिया नेटवर्क खोलेका थिए।

लामिछाने गोर्खा मिडियाका प्रबन्ध निर्देशक थिए। सूर्य थापा नेतृत्वको संसदीय छानबिन समितिले जोशीसहित चार व्यक्तिको नाम किटान गर्दै कारबाही गर्न सिफारिस गरेको थियो।

सूर्यदर्शन सहकारीसहितका ५ वटा सहकारीको ६५ करोड रुपैयाँ गोर्खा मिडियामा अपचलन भएको निष्कर्ष निकालेको समितिले मिडिया नेटवर्कका अध्यक्ष जीबी राई, तत्कालीन प्रबन्ध निर्देशक रवि लामिछाने र सञ्चालक छविलाल जोशी तथा कुमार रम्तेलमाथि कारबाही गर्न सिफारिस गरेको छ।

समितिले संसदमा बुझाएको ११२४ पेजको प्रतिवेदनको १८औँ परिच्छेदमा सिफारिसका विषयमा उल्लेख छन्।

‘सहकारी संस्थामा रहेको बचतकर्ताको रकम अनियमित तवरबाट गोरखा मिडया नेटवर्क प्रालि.को खातामा आइसकेपछि उक्त रकम खर्च गर्ने, गराउने प्रक्रियामा संलग्न रहेको देखिन आएबाट निज सञ्चालकहरू अध्यक्ष गितेन्द्रबाबु राई र सदस्य कुमार रम्तेल तथा तत्कालीन प्रबन्ध निर्देशक रवी लामिछाने र सञ्चालक छविलाल जोशी कम्पनीमा साझेदारका रूपमा बहाल रहेको अवधिमा सहकारीबाट कम्पनीमा आएको रकमको हकमा जिम्मेवार रहेको हुँदा प्रचलित कानून बमोजिम कारबाहीका लागि नेपाल सरकारलाई सिफारिस गर्ने,’ समितिको सुझाव तथा सिफारिस खण्डमा उल्लेख छ।

गोर्खा मिडिया नेटवर्कका तत्कालीन प्रबन्ध निर्देशक, पूर्वगृहमन्त्री तथा रास्वपा सभापति रवि लामिछाने र कम्पनीका अध्यक्ष गितेन्द्रबाबु (जीबी) राई र सञ्चालक छविलाल जोशीले संयुक्त खाता सञ्चालन गरी कर्मचारीलाई तलब भत्ता समेत सहकारीबाटै खुवाएको समितिको प्रतिवेदनमा उल्लेख छ।

सहकारीको पैसा मिडियामा लगानी गर्नु आफैंमा पनि नियम विपरीत भएकाले समितिले यो तर्कलाई केन्द्रमा राखेर, रवि, जिवी र छबी तीनै जनलाई ‘दोषी’ का रुपमा चित्रण गरेको छ।

यद्यपि लामिछानेले ऋण र लगानीका विषयमा आफूलाई केही थाहा नभएको जिकिर गर्दै आइरहेका छन्। तर उनीहरूले छानबिन समितिले आफूलाई क्लिनचिट दिएको समेत उल्लेख गरेका छन्। समितिमा ९ घण्टा दिएको बयानमा पनि उनले आफूलाई केही थाहा नभएको तर्क गरेका थिए।

गोर्खा मिडियाका अध्यक्ष जीवी राई भने यतिबेला मलेसियामा छन्। उनलाई नेपाल फर्काउने प्रयासहरु सफल भएका छैनन्।

नेपाल प्रहरीका प्रतिनिधी मलेसिया नै पुगेर उनीबारे सोधखोज गरे पनि कानुनी अड्चनका कारण जीवीलाई नेपाल ल्याउन प्रहरी निष्फल देखिएको छ।

कास्की प्रहरीले सहकारी रकम अपचलनका विषयमा पूरक जाहेरीका आधारमा रविमाथि अनुसन्धान जारी राखेको बताउन थालेको छ।