बाढीपहिरो : कोशीमा ५ जनाको मृत्यु, ९ बेपत्ता

विराटनगर- कोशी प्रदेशमा बाढीपहिरोमा परी मृत्यु हुनेको संख्या ५ पुगेको छ भने ९ जना बेपत्ता भएका छन्।

कोशी प्रदेश प्रहरी प्रहरी कार्यालयका प्रवक्ता एसएसपी भीम दाहालका अनुसार पाँचथरमा ४ र धनकुटामा १ जनाको मृत्यु भएको छ।

पाँचथरमा पहिरोमा परी चार जना र झापा, मोरङ र इलाममा ५ जना बेपत्ता भएका छन्।

पाँचथरको फिदिम नगरपालिका–४ मा पहिरोले घर पुरिँदा २४ वर्षीया सपना शेर्पा र उनकी ५ वर्षीया छोरी डोल्मा शेर्पाको मृत्यु भएको छ। फिदिम–१२ घर भएका आमाछोरी डेरा लिएर फिदिम-४ मा बस्दै आएका थिए।

फिदिम- १ साँगेबोटेमा पहिरोले घर पुरिँदा अर्का एक जनाको मृत्यु भएको छ। फिदिम-१ कात्तिके घर भई फुरुङ्गा हाइड्रो पावरमा काम गर्ने ५० वर्षीय गोपी विश्वकर्माको मृत्यु भएको छ।

फिदिम-१ का ५० वर्षीय कृष्ण दास, ४० वर्षीया कमला दास, ५५ पर्षीय धनकुमार तुम्बापो, २१ वर्षीय सरस्वता तुम्बापो बेपत्ता भएका छन्। पहिरोमा परी दुई जना घाइते छन्। प्रहरीका अनुसार मृतक र बेपत्ता फुरुङ्गा हाइड्रो पावर कम्पनीमा काम गर्ने कर्मचारी हुन् ।

धनकुटाको पाख्रीबास नगरपालिका– ५ पहिरोले घर पुरिँदा ५० वर्षीया रामकुमारी तामाङ र ३२ वर्षीया आशा तामाङको मृत्यु भएको छ। उनीहरु आमाछोरी हुन्।

झापामा तीनजना बेपत्ता भएका छन्। शुक्रबार साँझ कचनकवल गाउँपालिका–१ का पञ्चु राजवंशीकी १४ वर्षीया छोरी नेहारिका जमुवा खोलामा बेपत्ता भएकी छन्। खोला तर्ने क्रममा उनी बेपत्ता भएकी हुन्।

कमल गाउँपालिका-१ स्थित किस्ने खोलामा माछा मार्ने क्रममा सोही ठाउँका ३५ वर्षीय टीकाराम चौधरी बेपत्ता भएका छन्।

गौरीगञ्ज गाउँपालिका-३ र २ को सिमानामा रहेको हुलाकी सडकमा पर्ने किस्ने खोलाको पुलबाट गौरीगञ्ज-२ का ५० वर्षीय केमालाल ताजपुरिया बेपत्ता भएका छन्। उनीहरुको खोजी जारी छ।

शुक्रबार दिउँसो इलामको माइ नगरपालिका ८ स्थित सेते खोला तर्ने क्रममा स्थानीय ६८ वर्षीय मैतबहादुर लिम्बू बेपत्ता भएका छन्। त्यस्तै मोरङको रतुवामाइ नगरपालिका ७ बस्दै आएका ७२ वर्षीया डुरोदेवी राजवंशी रतुवाखोला तर्ने क्रममा बेपत्ता भएकी छन् ।