काठमाडौँ-चित्लाङ-हेटौँडा र हेटौँडा-पालुङ-नौबिसेमा गुड्न थाले गाडी

हेटौँडा- हेटौँडा–चित्लाङ–चन्द्रागिरि–काठमाडौँखण्डमा यातायातका साधन सञ्चालन भएका छन्।

मकवानपुर जिल्ला प्रहरी कार्यालयका निमित्त प्रवक्ता ठाकुरप्रसाद सापकोटाका अनुसार यो सडकमा कुनै अवरोध नरहेकाले यातायातका साधन पुनः सञ्चालन भएका हुन्। हेटौँडा–पालुङ–नौबिसे सडकखण्डमा हलुका सवारी सञ्चालन भएका छन्।

शुक्रबार बिहानसम्म यी सडकमा सवारीसाधन सञ्चालनमा स्थानीय प्रशासनले रोक लगाएको थियो। बाढीपहिरोका कारण अवरुद्ध सबै सडक सञ्चालन गर्ने प्रयास भइरहेको प्रमुख जिल्ला अधिकारी तीर्थराज चिलुवालले बताए।

हेटौँडा–काठमाडौँ जोड्ने सडकअन्तर्गत हेटौँडा–भैँसे–रातोमाटे खण्डको गोल्पिङबेँसीमा खसेको पहिरो पन्छाउन चार वटा मेसिन प्रयोग गरेर काम भइरहेको छ।

मकवानपुरको सोही सडक खण्डअन्तर्गत भिमफेदी गाउँपालिका-६ स्थित देउरालीबाट इन्द्रसरोवर गाउँपालिका-२ सिमखोलासम्मको पहिरो पन्छाइसकिएको र इन्द्रसरोवर गाउँपालिका–२ स्थित बाढीले बगाएको कुलेखानी पुलको निर्माण भइरहेको उनले जानकारी दिए।

दक्षिणकाली–फर्पिङ सडकअन्तर्गत महालक्ष्मी खोलादेखि पाकेलसम्म र पाकेलदेखि फर्पिङसम्मका केही भागमा खसेको पहिरो पन्छाउन दुईवटा मेसिन चलाइएको छ।