रास्वपा कार्यकर्ता र सहकारी पीडितबीच ढुंगा हानाहान

चितवन- राष्ट्रिय स्वतन्त्र पार्टी (रास्वपा)का सभापति रवि लामिछानेका समर्थक/रास्वपाका कार्यकर्ता र सहकारी पीडितबीच चितवनमा ढुंगा हानाहान भएको छ।

नारायणगढस्थित नारायणी कला मन्दिरमा रास्वपा भेलामा रवि लामिछानेसँग कुरा राख्न गएका चितवनका सहकारी पीडित र लामिछानेका समर्थकबीच ढुंगा हानाहान भएको हो।

दुवै पक्षीबीच ढुङ्गा हानाहान हुँदा केही बेर तनाव सृजना भएको थियो। ढुङ्गा हानाहानमा केही सहकारी पीडित घाइते भएका छन्।

रास्वपाले भने लामिछानेले चितवनवासीसँग भेटघाट कार्यक्रम कांग्रेस र एमालेका कार्यकर्ताले बिथोल्न खोजेको आरोप लगाएको छ।

कार्यक्रम बिथोल्न कांग्रेस र एमालेका स्थानीय कार्यकर्ता नै संलग्न रहेको रास्वाको दाबी छ।

लामिछानेको नारायणगढमा भएको सार्वजनिक कार्यक्रममा आफ्ना कुरा राख्न भनेर सहकारी पीडितहरुका गएका थिए। उनीहरुलाई गेटभित्र पस्न नदिएपछि जबरजस्तीभित्र गएर आफ्ना कुरा राख्ने कोसिस गरेका थिए।

तर उनीहरूमाथि भित्रैबाट ढुङ्गा र पानीको बोतल हानिएको थियो। त्यसपछि बाहिरबाट पनि सहकारीका पीडितले प्रतिकार गरेका थिए।

दुई जना घाइते भरतपुर अस्पतालमा रहेको सहकारी पीडित संघर्ष समितिका संयोजक शालिकराम दुवाडीले बताएका छन्।

आफ्ना कुरा राख्न आउँदा उल्टै हातपात भएको उनको भनाइ छ।

५ जना पीडितलाई प्रहरीले पक्राउ गरेको पनि उनको भनाइ छ।

चितवनका प्रमुख जिल्ला अधिकारी इन्द्रदेव यादवले भने घाइते तथा प्रहरी नियन्त्रणमा रहेकोबारे जानकारी नभएको जिकिर गरे।

लामिछानेविरुद्ध शुक्रबार दिउँसो मुग्लिन बजारमा समेत विरोध प्रदर्शन भएको थियो।