मुस्ताङमा शुक्रबारदेखि इन्टरनेसनल माउन्टेन आर्ट फेस्टिभल

पोखरा- हिमाल पारीको जिल्ला एवं प्रसिद्ध पर्यटकीय गन्तव्य मुस्ताङमा प्रकृति, संस्कृति र सिर्जनशीलताको उत्सवका रूपमा शुक्रबारदेखि आगामी ८ गतेसम्म साताव्यापी इन्टरनेसनल माउन्टन आर्ट फेस्टिभल हुँदैछ।

महोत्सवमा नेपालका श्रीजन राजकर्णिकार, एरिना ताम्रकार, हरेराम जोजू, एनबि गुरुङ, वाङ लामा, मनोज तामाङ, आकाश गुरुङ, ध्वज गुरुङ, नवीन नाल्बो लगायत थाइल्याण्ड, पोल्याण्ड, रुमानिया, इन्डोनेसिया, ताइवान, र भुटानका १६ जना कलाकारहरूले हिमाली क्षेत्रमा तत्स्थानीय सजीव चित्रकला र सिर्जनात्मक प्रस्तुति दिने जनाइएको छ।

महोत्सवमा काठमाडौं अन्तर्राष्ट्रिय पर्वतीय चलचित्र महोत्सव अन्तर्गत हुने फिल्म प्रदर्शनीले पर्वतीय समुदायको कथा र प्रकृतिको सौन्दर्यलाई सिनेमा माध्यमबाट प्रस्तुत गर्नेछ। फिल्म प्रदर्शनीले हिमाली जनजीवनको संघर्ष, सफलताका कथा र प्राकृतिक छटालाई पर्दामा उतार्नेछ, जसले दर्शकलाई हिमाली जीवनशैलीको अनभिज्ञ पक्षहरूसँग जोड्नेछ।

हिमाली क्षेत्रको भूगर्भीय विशेषता महोत्सवको अर्को आकर्षण हो। फोसिल हन्ट र स्टोन आर्ट कार्यक्रमले पुराना जीवाश्महरूको खोजी र त्यसमा आधारित कला सिर्जनालाई प्रोत्साहित गर्नेछ। हिमाली क्षेत्रको समृद्ध इतिहास र भूगर्भीय महत्वलाई कलात्मक रूपमा प्रस्तुत गर्नु यसको उद्धेश्य हो।

महोत्सवमा संस्कृति र परम्परालाई जीवन्त राख्न स्थानीय सङ्गीत, नृत्य र साँस्कृतिक कार्यक्रमहरू पनि राखिएको छ। स्थानीय र अन्तर्राष्ट्रिय संगीतकारहरूले हिमाली क्षेत्रको शान्त वातावरणमा साँगीतिक प्रस्तुति दिँदै ध्वनि उपचार जस्तो पारम्परिक विधिको उपयोगले मानसिक र शारीरिक सन्तुलनको अनुभूति गराउन महत्वपूर्ण भूमिका खेल्ने छन्।

मुस्ताङ आर्ट प्रोजेक्टद्वारा आयोजित महोत्सवमा मुख्य प्रायोजकहरूमा रेडहाउस लज र थाङविल्ला रहेका छन्। महोत्सवलाई युरोपियन युनियनले सहयोग गरेकोे छ। मुस्ताङको प्राचीन साँस्कृतिक धरोहरलाई जगेर्ना गर्ने उद्देश्यले आयोजना गरिएको यो महोत्सवले नेपाललाई विश्व साँस्कृतिक क्षेत्रमा स्थापित गर्ने अभिप्राय राखेको छ।

महोत्सवले हिमाली जीवनशैली, प्राकृतिक सौन्दर्य र साँस्कृतिक विविधताको महत्वलाई कलाको माध्यमबाट उजागर गर्दै स्थानीय पर्यटनलाई प्रोत्साहन गर्न, अन्तर्राष्ट्रिय स्तरमा नेपाली कला र संस्कृति प्रस्तुत गर्न, मुस्ताङ क्षेत्रलाई थप लोकप्रिय बनाउन महत्वपूर्ण भूमिका खेल्ने जनाइएको छ।

महोत्सवले स्थानीय स्तरमा रोजगार सिर्जना गर्न, साँस्कृतिक सम्पदाको संरक्षणमा टेवा पुर्‍याउन र अन्तर्राष्ट्रिय स्तरमा नेपालको साँस्कृतिक पहिचानलाई मजबुत बनाउन सक्ने सम्भावना रहेको छ। प्रकृति, संस्कृति र कलालाई एउटै मञ्चमा प्रस्तुत गर्दा मानव र प्रकृतिको अनन्त सम्बन्धलाई अझ मजबुत बनाउन मद्दत पुर्‍याउने आयोजकले जनाएको छ।

प्रकृति, संस्कृति र सिर्जनशीलता मिश्रित अद्वितीय महोत्सवले मुस्ताङलाई सिंगो विश्वको साँस्कृतिक केन्द्रको रूपमा चिनाउन मद्दत गर्नेछ। यो महोत्सव नेपालका लागि मात्र नभइ समग्र विश्वका कला प्रेमीहरूका लागि प्रेरणाको स्रोत बन्न सक्ने दावी आयोजकको छ।