ठाउँठाउँमा रास्वपाको अवरोध झेल्दै राति ३ बजे पोखरा ल्याइए रवि

पोखरा- सहकारी ठगी प्रकरणमा पक्राउ परेका पूर्वगृहमन्त्रीसमेत रहेका राष्ट्रिय स्वतन्त्र पार्टीका सभापति रवि लामिछानेलाई पोखरा ल्याइएको छ। शुक्रबार साँझ पक्राउ परेका रविलाई सडकमार्ग हुँदै शनिबार बिहान ३ बजे कास्की प्रहरी कार्यालय ल्याइएको हो।

रविलाई पोखरा लैजाँदा रास्वपाका कार्यकर्ताले ठाउँठाउँमा नाराबाजी गरेका थिए। केही स्थानमा अवरोधको प्रयास पनि गरेका थिए।

लामिछाने पक्राउ परेलगत्तै रास्वपाले सुरु गरेको नाराबाजी र प्रदर्शन रातभर चलेको थियो। रविका समर्थकहरूले उनलाई पक्राउ गरेको आक्रोशमा सरकार र प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाविरुद्ध चर्का नाराबाजी गरेका थिए।

रास्वपाले धादिङ, चितवन, तनहुँ हुँदै पोखरासम्म नै सडकमा समर्थकको भीड उतारेको थियो।

लामिछानेलाई प्रहरीले गाडीमा राखेर लैजाँदै गर्दा ठाउँ-ठाउँमा रास्वपाका नेता कार्यकर्ताहरूले बाटो छेकेर नाराबाजी र विरोध प्रदर्शन गरेका थिए भने कतिपय ठाउँमा बाक्लो प्रहरी परिचालन गर्नुपर्ने स्थिति बनेको थियो।

धादिङको गल्छी मलेखुलगायतका स्थानमा रास्वपाले प्रहरीलाई अवरोध गर्ने प्रयास गरेको थियो। चितवन-२ बाट निर्वाचित सांसद लामिछानेको पक्षमा मुग्लिनमा भीड जम्मा भएको थियो। प्रहरीले लामिछानेलाई मुग्लिन कटाउञ्जेल नारायणगढ-मुग्लिन सडक नै बन्द गराएको थियो।

लामिछानेलाई प्रहरीले मुग्लिन पुर्‍याउँदा उनीहरूले प्रहरीको गाडी रोकेर लामिछानेसँग संवाद गर्ने भन्दै धकेलाधकेल समेत गरेका थिए। मुग्लिनमा जम्मा भएका नेता कार्यकर्ताहरू पोखरासम्मै पुगे।

लामिछानेलाई राति ३ बजे प्रहरीले पोखरा पुर्‍याएर हिरासतमा लिएपछि समेत समर्थकहरूले प्रहरी कार्यालयबाहिर नाराबाजी गर्दै सरकारको विरोध गरे। लामिछानेले आफ्नो पक्षमा भीड देखाएर अनुसन्धानलाई प्रभावित पार्ने प्रयास गरेको भन्दै आलोचना पनि भइरहेको छ।

पोखरास्थित सूर्यदर्शन सहकारीको डेढ अर्ब रकम ठगी भएको प्रहरी अनुसन्धानले देखाएको छ। अपचलनमा संलग्न भएको आरोपमा अनुसन्धान गर्न कास्की जिल्ला अदालतले प्रहरीलाई शुक्रबार अनुमति दिएसँगै लामिछानेलाई पक्राउ गरेर प्रहरीले पोखरा लगेको हो।

सूर्यदर्शन सहकारीको संस्थापक अध्यक्ष गितेन्द्रबावु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दा जिल्ला प्रहरी कार्यालय कास्कीले अनुसन्धान गरिरहेको छ।

रास्वपाले काठमाडौँसहित सडकमार्ग र पोखरामा कार्यकर्ताहरूलाई सडकमा उत्रिन आन्तरिक सर्कुलर गरेको थियो।

रास्वपाका नेताहरूका अनुसार शनिबारदेखि थप प्रदर्शनका कार्यक्रमहरू बनाइएको रास्वपाका सांसद शिव नेपालीले जानकारी दिए।

शनिबार राति लामिछानेको पक्षमा नाराबाजी गर्दै सयौँको संख्यामा नेता कार्यकर्ताहरू पोखरा पुगिसकेका छन्।

जिल्ला प्रहरी कार्यालय ल्याइएलगत्तै प्रहरीले रविलाई स्वास्थ्य परीक्षण गराउन पोखरा स्वास्थ्य विज्ञान प्रतिष्ठान लगेको थियो।

जिल्ला अदालत कास्कीले उनीसहित १४ जना विरुद्ध पक्राउ पुर्जी जारी गरेको थियो।

रविविरुद्ध जिल्ला प्रहरी कार्यालय कास्कीले संगठित अपराध र सहकारी ठगीको कसुरमा अनुसन्धान हुनेछ।

उनलाई आइतबार अदालतमा उपस्थित गराइनेछ। अदालतमा उपस्थित गराएपछि अनुसन्धानका लागि प्रहरीले म्याद माग्नेछ। अदालतले दिएको म्याद(थप हुन सक्ने)भित्र प्रहरीले अनुसन्धान सकेर फाइल सरकारी वकिलको कार्यालयमा बुझाएपछि उसले अदालतमा मुद्दा दर्ताको प्रक्रिया अघि बढाउनेछ।

गोर्खा मिडियाका तत्कालीन प्रबन्ध निर्देशकसमेत रहेका लामिछानेले गीतेन्द्रबाबु (जीबी) राईसँग मिलेर सहकारीको पैसा अपचलन गरेको संसदीय छानबिन विशेष समितिले निष्कर्ष निकालेको छ।

प्रतिवेदनले गोर्खा मिडिया नेटवर्कका तत्कालीन प्रबन्ध निर्देशक लामिछाने, अध्यक्ष जीबी राई, तत्कालीन उपाध्यक्ष तथा नेपाल प्रहरीका पूर्वनायब महानिरीक्षक (डीआईजी) छविलाल जोशी र सञ्चालक कुमार रम्तेलविरुद्ध ठगी, कीर्ते, संगठित अपराध र सम्पत्ति शुद्धीकरणसम्बन्धी कसुर आकर्षित हुने भन्दै अनुसन्धान गरी कारबाही प्रक्रिया अघि बढाउन सिफारिस गरेको छ।

संसदीय समितिको प्रतिवेदनको परिच्छेद ८ मा सहकारी ठगी प्रकरण सहकारी ऐन २०७४, मुलुकी अपराध संहिताको किर्तेसम्बन्धी दफा, संगठित अपराध निवारण ऐन २०७० र सम्पत्ति शुद्धीकरण (मनि लाउन्डरिङ) निवारण ऐन २०६४ का कानुन आकर्षित हुने उल्लेख छ।

पोखराको सूर्यदर्शन, चितवनको साहारा, बुटवलको सुप्रिम र काठमाडौंको स्वर्णलक्ष्मी सहकारीबाट गोर्खा मिडियामा मात्र ६५ करोड ५४ लाख रुपैयाँ ल्याइएको थियो, कम्पनीमा अध्यक्ष जीबी राई र प्रबन्ध निर्देशक लामिछाने थिए।

लामिछानेले गोर्खा मिडियामा १५ प्रतिशत ‘स्वेट सेयर’ लिएर प्रवेश गरेको र निस्कँदा त्यो सेयर कम्पनीलाई नै फिर्ता गरेको दाबी गरेका थिए। तर, यो रकम ‘स्वेट सेयर’ नभई सहकारीको रकम भएको र उनी कम्पनीबाट बाहिरिने क्रममा पैसा लिन बुझाएका कागजातमा पनि कीर्ते गरिएको प्रतिवेदनमा उल्लेख छ।

संगठित तवरले कीर्तेसमेत गरी सहकारी ठगी गरेको र त्यस्तो रकमबाटै गोर्खा मिडिया नेटवर्क सञ्चालन गरिएकाले सम्पत्ति शुद्धीकरण निवारण ऐनअनुसार पनि कारबाही गर्न प्रतिवेदनको सिफारिस छ।

एमाले सांसद सूर्य थापाको नेतृत्वमा गठित संसदीय समितिले सहकारीको बचत अपचलनमा उनीहरूलाई दोषी किटान गर्दै गत भदौ ३१ मा प्रतिनिधि सभामा पेस गरेको थियो। प्रतिवेदन कार्यान्वयनका लागि संसद्ले प्रतिवेदन सरकारलाई पठाएको थियो।

गोर्खा मिडियामा रविका एक साझेदार छविलाल जोशी पक्राउ परिसकेका छन्। उनलाई गत असोज ६ गते पक्राउ गरिएको हो भने गोर्खाका अध्यक्ष जिबी राई फरार छन्। छविलालमाथि अनुसन्धान गर्न कास्की अदालतबाट प्रहरीले थप २० दिनको अनुमित लिएको छ।