राजनीतिक कोर्स बदल्ने बेला आयो : प्रचण्ड

काठमाडौँ- नेकपा माओवादी केन्द्रका अध्यक्ष पुष्पकमल दाहाल प्रचण्डले राजनीति कोर्ष बदल्नुपर्ने बेला आएको बताएका छन्।

माओवादी केन्द्र गोरखा-काठमाडौँ सम्पर्क समन्वय समितिको दोस्रो अधिवेशन उद्घाटन गर्दै उनले यस्तो धारणा राखेका हुन्।

शासकीय स्वरुप र निर्वाचन प्रणाली बदलेर राजनीतिक कोर्ष बदल्नुपर्ने उनको भनाइ छ।

आफ्नो पार्टीको चुनबाङ बैठकबाट गणतन्त्रको अभ्यास गर्दै जाँदा यसलाई यथास्थितिमा राख्ने र जनताको गणतन्त्र बनाउने शक्तिबीच टक्कर पर्ने अड्कल गरेको स्मरण गर्दै उनले अब राजनीतिक कोर्स बदल्ने बेला आएको बताएका थिए।

अध्यक्ष प्रचण्डले प्रत्यक्ष निर्वाचित कार्यकारी प्रमुख रहने शासकीय प्रमुख, पूर्ण समानुपातिक निर्वाचन प्रणाली र सांसद नभएर विज्ञलाई मन्त्री बनाउने व्यवस्थामा गएर मात्रै जनताको गणतन्त्र सुदृढ गर्न सकिने धारणा व्यक्त गरे।

यसका आन्दोलन जरुरी रहेको र आन्दोलन गर्न माओवादी बलियो हुनुपर्नेमा उनको जोड थियो। अरु दलभन्दा राष्ट्र र परिवर्तनप्रति इमान्दार माओवादी नै रहेछ भन्ने जनतामा बोध हुँदै जानु आफ्ना लागि महत्त्वपूर्ण पक्ष भएको उनको भनाइ थियो।

यसपटक विरोधीहरुले माओवादी केन्द्रलाई जनतातर्फ फर्कने अवसर दिएको उल्लेख गर्दै उनले भने, ‘अब पार्टी जनतातर्फ फर्कन सुरु गरेका छौँ। यसले देशभर सकारात्मक प्रभाव परेको र केही जिल्लामा २०६४ कै अवस्था फर्कने थालेको छ।  त्यसको परिणाम उपनिर्वाचनले देखाएको छ।’

अध्यक्ष प्रचण्डले विभाजनको शृङ्खला रोकिएर एकताको प्रक्रिया सुरु भएको उल्लेख गरे। पार्टीको वैचारिक र नेतृत्वको केन्द्रीकरणले आगामी समाजवादी अभियान अघि बढाउन संभव हुने उल्लेख गर्दै उनले विभिन्न धारामा बाँडिएका शक्तिबीचको एकतालाई जोड दिएर लैजाने बताए।

जनयुद्धको तयारी, थालनी, सञ्चालन हुँदै पछिल्लो समयसम्म पार्टी नेतृत्वको वैचारिक भौतिक रक्षामा गोरखा जिल्लाको अग्रणी भूमिका रहेको उनले स्पष्ट गरे।

अध्यक्ष प्रचण्डले देशभर निरासा छाएको बेला २०७९ मा ९ वटा स्थानीय तह जितेर इतिहास बनाएको गोरखाले अहिले उपनिर्वाचनमा पनि हारेको ठाउँमा जितेर नयाँ इतिहास कायम गरेको जिकिर गरे। उपनिर्वाचनमा गोरखा नगरपालिका-५ बाट निर्वाचित वडाध्यक्ष विष्णु रानालाई उनले सम्मान गरेका थिए।