रास्वपाको नेता बन्न ५ आकांक्षी, अन्तिममा डीपीलाई अघि सार्ने तयारी

काठमाडौँ– राष्ट्रिय स्वतन्त्र पार्टी संसदीय दलका नेता रवि लामिछानेको सांसद पद नै निलम्बनमा परेपछि कार्यवाहक नेताको तोक्न पार्टीले सचिवालय बैठक बोलाएको छ। शुक्रबार दिउँसो ३ बजे सचिवालय बैठक बोलाइएको पार्टीले जानकारी दिएको हो।

पार्टी केन्द्रीय कार्यालय वनस्थलीमा बस्ने बैठकमा संसदीय दलको कार्यवाहक नेता तोक्नेबारे छलफल हुने एक नेताले बताए। ‘शुक्रबारको सचिवालय बैठक संसदीय दलको नेताको विषयमा छलफल गर्नका लागि हो,’ ती नेताले भने।

सहकारी ठगी, संगठित अपराध र सम्पति शुद्धीकरणको कसुरमा कास्की जिल्ला अदालतमा मुद्दा दर्ता भएपछि सभापति तथा संसदीय दलका नेता रवि लामिछाने सोमबार निलम्बनमा परेका हुन्।

रास्वपा संसदीय दलको नेतामा ५ आकांक्षी छन्। संसदीय दलको उपनेता विराजभक्त श्रेष्ठ, कार्यवाहक सभापति डिपी अर्याल, उपसभापति स्वर्णिम वाग्ले, सहमहामन्त्री सुमना श्रेष्ठ र सांसद चन्दा कार्कीले संसदीय दल नेतामा दाबी गरेका छन्।

डीपी कार्यवाहक सभापतिसमेत रहेकाले उनलाई नै संसदीय दलको कार्यवाहक नेता तोक्ने गरी प्रस्ताव लैजाने तयारी पार्टीको छ। तर उपनेता विराजभक्तले आफू स्वतः संसदीय दलको उत्तराधिकारी भएको धारणा राखेका छन्।

उता सहमहामन्त्री सुमना श्रेष्ठले पार्टीका केन्द्रीय सदस्य मात्र भएको म्यासेन्जर ग्रुपमा आफू संसदीय दलको कार्यवाहक नेतामा आउन इच्छुक रहेको बताएकी छन्। निलम्बित भइसकेपछि सभापति रवि लामिछानेले हिरासतबाटै डीपीलाई कार्यवाहक सभापति बनाएको भन्दै उनले विरोध गरेकी छन्। उनले रविको उक्त कदमलाई ‘टीके शैली’ पनि भनेकी छन्।

उपसभापति डा स्वर्णिम पक्षधरले भने समानुपातिक तर्फबाट आएका सांसदलाई दलको कार्यवाहक नेता तोक्दा सकारात्मक सन्देश नजाने तर्क गर्न थालेका छन्।

डा चन्दाले कार्यवाहक नेता पदका लागि आफू अनुभवी भएको भन्दै दाबी गरेकी छन्।