शान्ति प्रक्रिया टुंगो लाग्दा प्रचण्डलाई कमजोर हुने डर

काठमाडौँ– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले शान्ति प्रक्रिया टुंगोमा पुग्दा  आफू र माओवादी कमजोर हुने भन्दै अभिव्यक्ति दिएका छन्।

बुधबार ‘शान्ति प्रक्रिया र बेपत्ता नागरिक सार्वजनिकीकरणको सवाल’ कार्यक्रममा बोल्दै उनले यस्तो धारणा राखेका हुन्। शान्तिप्रक्रियालाई माओवादी सिध्याउने हतियार बनाइएको उनको भनाइ थियो।

शान्ति प्रक्रिया टुंगोमा पुर्‍याउन आफूले पटकपटक प्रयास गरेको जिकिर उनले गरे। तर राजनीतिक कारणले शान्ति प्रक्रियाका बाँकी काम टुंग्याउन कठिन भएको उनको भनाइ थियो। यस्तै नेकपा एमालेले टुंगिन लागेका बेला गएर रोक्ने गरेको आरोपसमेत लगाए।

‘टुंग्याउन कठिन भएको राजनीतिक कारणले नै हो। त्यहाँ कन्फ्युजन हुनुपर्ने कुरा केही पनि छैन। एउटा प्रवृत्ति नहोस् भन्ने नै छ। अझ गम्भिर प्रवृत्ति के छ भने माओवादीलाई तह लगाउने अन्तिम यही छ किन टुङ्ग्याउनु माओवादी सिध्याएर मात्रै अनि के गर्नुपर्छ गरौंला भन्ने राजनीतिक सोच र प्रवृत्तिका मान्छे पनि छन,’ उनले भने, ‘यो कुरा आवेग पनि होइन, सेन्टिमेन्ट पनि होइन एउटा राजनीतिक नेतृत्व र प्रवृत्ति त्यस्तो छ। टुंगिन लागेका बेला गएर रोक्छ त्यसले। माओवादीलाई तह लगाउने सिध्याउने अन्तिम हतियार यही नै हो टुङग्याउन हुन्न भन्ने सोच भएको प्रवृत्ति छ।’

त्यस्तै, पीडितहरु एकतावद्ध भएर राज्यलाई र राजनीतिक नेतृत्वलाई अब त नसोचे बर्बाद हुने भयो भन्ने ठाउँमा नपुर्‍याएसम्म अर्को १८ वर्ष सम्म शान्ति प्रक्रिया टुङग्गो नलाग्ने उनको भनाई छ।

‘यसको समाधान पीडितहरुले बेलाबेलामा यो कुरा उठाईराख्नु, जरुरी पर्दा सडकमा पनि जाने तयारी गर्नु किनकी अन्तिममा सडक नै हुने हो कि जस्तो मलाई लागेको छ,’ उनले भने, ‘यो विषय कानुनी भन्दा पनि बढि राजनैतिक नै छ। पीडितहरु एकतावद्ध भएर राज्यलाई र राजनीतिक नेतृत्वलाई अब त नसोच बर्बाद हुने भयो भन्ने ठाउँमा नपु¥याएसम्म यो अर्को १८ वर्ष जान नि बेर छैन्।’