अमेरिका आगलागीः १९०० भवन जलेर खरानी, हलिउड स्टारदेखि कमला ह्यारिसम्मका घर खाली गराइए

एजेन्सी – अमेरिकाको क्यालिफोर्निया राज्यको लस एन्जलसको जंगलमा लागेको आगलागीका कारण हालसम्म १ हजार ९ सय भवन जलेर खरानी भएका छन्।

आगलागी यति भयानक छ कि हलिउड स्टारदेखि अमेरिकी उपराष्ट्रपति कमला ह्यारिससम्मका घर खाली गराइएको छ।

मंगलबारदेखि सुरु भएको आगलागी ३ दिनमा २८ हजार एकडमा फैलिँदा ५ जनाको मृत्यु भएको छ। झण्डै ५० हजार मानिसलाई तत्काल घर छाड्न भनिएको छ। योसँगै करिब ३ लाख मानिसलाई सुरक्षित स्थानमा जान निर्देशन दिइएको छ।

उक्त क्षेत्रमा करिब १६० किलोमिटर प्रतिघण्टाको गतिमा हावाहुरी चलिरहेकाले आगो नियन्त्रण गर्न कठिन भइरहेको छ।

तीव्र हावाका कारण आगोले फायरनेडो (फायरंटोर्नाडो) को रूप धारण गरेको छ। जसरी टोर्नाडोमा हावाको बादल बनेको हुन्छ, त्यसैगरी आगोको ज्वालाले आकाश छोएको देखिएको छ।

जंगलबाट फैलिएको आगो बस्तीसम्म पुग्दा मानिसहरु घरबाट भागिरहेका छन्। यहाँ बसोबास गर्ने घरपालुवा र जंगली जनावरहरू जलेर खरानी भएका छन्।

आगलागीले पूरै क्षेत्रमा धुवाँको मुस्लो फैलिएको छ। यो आगलागीबाट निस्केको धुवाँ अन्तरिक्षबाट समेत देखिएको छ। उद्धार टोलीले आगो नियन्त्रणको प्रयास गरिरहेको छ। आगो नियन्त्रणका लागि हेलिकप्टरको समेत सहयोग लिइएको छ।