संविधान संशोधनबारे के भन्छन् प्रधानमन्त्री ओली?

काठमाडौँ- प्रधानमन्त्री केपी शर्मा ओलीले संविधान संशोधनका विषयलाई प्राथमिकतामा राख्ने बताएका छन्। शुक्रबार प्रतिनिधि सभामा सम्बोधन गर्दै ओलीले यस्तो बताएका हुन्।

‘संविधानअभ्यासमा देखा परेका सबल र दुर्बल पक्ष तथा जटिलताको समीक्षा गरी राजनैतिक स्थायित्वको लागि संविधानमा आवश्यक संशोधन र तदनुकुलको कानून निर्माण गर्ने विषयलाई यो सरकारले प्राथमिकता दिन्छ,’ उनले भने, ‘कांग्रेस र नेकपा (एमाले)ले विज्ञ सम्मिलित आन्तरिक अध्ययन कार्यदल बनाएको छ।’

विभिन्न पक्षसँग सघन विमर्श गरी पहिले संविधान संशोधनका विषयको पहिचान गरिने र ती विषयमा संसदमा प्रतिनिधित्व गर्ने र बाहिर रहेका दलहरु र सरोकारवालाहरुसँग छलफल गरिने ‍उनको भनाइ छ।

‘हामी स्पष्ट छौं, पार्टीहरुका आ–आफ्नै धारणा र पोजिसन हुन सक्छन्। मिलेका कुरामा साझा धारणा बनाइने छ, नमिलेका कुरामा बहस र छलफल गरिने छ,’ उनले भने, ‘संविधान संशोधन विधेयक ल्याउने काम सरकारको हो, बहस/छलफल आधारित निष्कर्षबाट सरकारले साझा धारणा बनाउँछ। त्यसैमा आधारित संशोधन प्रस्ताव तयार गर्छ।’